Ադրբեջանցիները դադարել են վստահել մանաթին

 Ադրբեջանի բանկային հատվածի ընդհանուր դեպոզիտային բազան (բացառությամբ ոչ ռեզիդենտների եւ պետական կառավարման մարմինների դեպոզիտների) 2015 թվականի սեպտեմբերի 1-ի դրությամբ կազմել է 4 038,7 մլն մանաթ, ինչը 438,5 մլն մանաթով, կամ 9,8 տոկոսով փոքր է օգոստոսի 1-ի դրությամբ համանման ցուցանիշից:

Ինչպես հաղորդում է «Արմենպրես»-ը, report.az-ը` հղում կատարելով Ադրբեջանի կենտրոնական բանկին, հայտնում է, որ ընթացիկ տարվա սկզբի հետ համեմատած` դեպոզիտների ծավալը 3 237,1 մլն մանաթով, կամ 44,5 տոկոսով կրճատվել է: Անցյալ տարվա համանման ցուցանիշի համեմատ` կրճատումը կազմել է 2 912,7 մլն մանաթ կամ 41,9 տոկոս:

Դրան զուգահեռ` արտասահմանյան փոխարժեքով դեպոզիտների ծավալը 2015 թվականի սեպտեմբերի 1-ի դրությամբ կազմել է 8 187,7 մլն մանաթ: Վերջին ամսվա ընթացքում այդ դեպոզիտների ծավալը 186 մլն մանաթով կամ 2,3 տոկոսով աճել է: Հունվարի 1-ին եղած վիճակի համեմատությամբ աճը կազմել է 4 057,4 մլն մանաթ, կամ 98,2 տոկոս, անցյալ տարվա սեպտեմբերի 1-ի դրությամբ` 4 333,7 մլն մանաթ կամ 112,4 տոկոս:

Ադրբեջանում արտարժույթով դեպոզիտների աճի միտումը շարունակվում է, դոլարիզացման գործընթացն արագանում է: Արտասահմանյան փոխարժեքով դեպոզիտների ծավալը երկու անգամ գերազանցում է մանաթով դեպոզիտների բազան: «Մանաթի լողացող փոխարժեքին անցնելու օպտիմալ ուղիների որոնման» մասին Ադրբեջանի ֆինանսների նախարար Սամիր Շարիֆովի վերջին հայտարարությունը վկայում է դոլարիզացման գործընթացը շարունակվելու մասին: