Life.panorama.am-ը գրում է.
Երեկ Հայաստանի թատերական գործիչների միությունում կայացավ երիտասարդ դերասանուհի Քրիստինա Կարապետյանի մոնոներկայացումը, որը բեմադրված էր Հենրիկ Իբսենի «Տիկնիկների տունը» պիեսի հիման վրա։ Ներկայացման բեմադրող ռեժիսորը Կարո Նաղդալյանն է, ով, ի դեպ, Քրիստինայի սիրելին է:
Ներկայացման ստեղծման ճանապարհի մասին ռեժիսորը պատմել է Life.panorama.am-ին՝ հայտնելով, որ հետաքրքիր զուգադիպությամբ «Տիկնիկների տունը» ստեղծագործությունը թե ինքը, թե Քրիստինան իրարից անկախ դեռ տարիներ առաջ են ցանկացել իրականացնել.
«Այս ներկայացումն իրականություն դարձնելու մտահղացումն ունեի դեռ վեց տարի առաջ, երբ նոր էի ընդունվում ինստիտուտ: Այն ժամանակ բավականին խորը հետաքրքրվել եմ թե այս, թե Հենրիկ Իբսենի այլ ստեղծագործություններով: Ավելի ուշ, երբ ծանոթացա Քրիստինայի հետ, իմացա, որ ինքն էլ ներքին ցանկություն է ունեցել այս կերպարը խաղալ: Հենց համատեղ զրույցներն էլ նոր միտք ծնեցին այն մոնոներկայացմամբ բեմադրելու»,- պատմեց Կարո Նաղդալյանն ու շարունկեց.
«Երկար ժամանակ աշխատեցինք, ամեն ինչին վերաբերվել ենք բծախնդրորեն, որպեսզի մեր պատկերացումներն իրականություն դառնան: Փորձերի ժամանակ մտածեցինք, որ Քրիստինան «Տիկնիկների տունը» մոնոներկայացումը որպես դիպլոմային աշխատանք էլ կներկայացնի: Ի դեպ՝ այս աշխատանքն իրականացնելու հարցում մեծ ներդրում է ունեցել նաեւ պարուսույց Մանե Հայրապետյանը»:
Հետաքրքրվելով, թե անձնական հարաբերությունները խանգարե՞լ, թե օգնել են զույգին՝ այս աշխատանքն իրականացնելիս, պատասխանեց.
«Սա արդեն երկրորդ աշխատանքն է, որ միասին ենք իրականացնում: Որպես բեմադրիչ՝ ինձ համար, երբ սկսվում է աշխատանքը, մի կողմ են մղվում անձնական, ընկերական հարաբերությունները եւ առաջին տեղում լինում է աշխատանքը: Եթե չպահպանվի այս սահմանը, ապա մեկը մյուսին կխառնվի եւ հաստատ լավ արդյունքի չի բերի: Նույն կերպ եւ մեր անձնական կյանքում է, մենք աշխատանքը չենք բերում մեր հարաբերություններ, գործը երբեք չի խառնվում անձնականին: Կարեւոր է գտնել այդ բալանսը, որ մեկի պատճառով, մյուս կողմը չտուժի»:
Որպես ռեժիսոր՝ Կարո Նաղդալյանը խոսեց դերասանուհի Քրիստինա Կարապետյանի մասին եւ ամփոփեց նաեւ պրեմիերայի արդյունքները.
«Մի այսպիսի արտահայտություն կա՝ «Եթե Համլետ չունես, ապա չես կարող այն բեմադրել», այսինքն՝ ռեժիսորի համար շատ կարեւոր է համապատասխան դերասան ունենալը: Ես արդեն ծանոթ էի Քրիստինային, գիտեի նրա հմտությունները, կարողությունները, գիտելիքները, եւ հասկացա, որ նա կարող է: Ինձ դուր է գալիս նրա պատկերացումներն այս պիեսի ու Նորայի կերպարի հետ կապված: Պրեմիերայից հետո էլ, ինչ խոսք, ես ունեի իմ դիտողությունները, որի մասին միայն ես ու նա իմացանք, բայց այն, որ Քրիստինային հաջողվեց հուզել ու ուրախացնել հանդիսատեսին, փաստեցին ծափերն ու վերջում մարդկանց թաց աչքերը: Ի վերջո, դերասանի կատարած աշխատանքի արդյունքը կայանում է նրանում, որ անհրաժեշտ պահին կարողանա հուզել եւ ուրախացնել»,- նկատեց նա:
Հավելենք նաեւ, որ «Տիկնիկների տունը» մոնոներկայացումը կցուցադրվի «Արմմոնո» միջազգային փառատոնի շրջանակներում, իսկ մինչ այդ Կարո Նաղդալյանը եւ Քրիստինա Կարապետյանն իրենց ընկերների հետ միասին, կաշխատեն նոր ներկայացման վրա, որը նվիրված է Եղեռնի զոհերի հիշատակին: Այն ուսուցողական բնույթ է կրում ու նախատեսված է հիմնականում դպրոցականների համար:
