Էրեբունի հնավայրի վերականգնման համար անհրաժեշտ է 8 մլն դոլարի ներդրում կատարել

ՀԱՍԱՐԱԿՈՒԹՅՈՒՆ 2 Մայիս, 2017 16:03

Էրեբունի հնավայրի վերականգնման երկու աշխատանքային և յոթ էսքիզային նախագիծ կա։
«Արմենպրես»-ի հաղորդմամբ՝ լրագրողների հետ զրույցում այս մասին ասաց «Էրեբունի» պատմահնագիտական արգելոց-թանգարանի տնօրեն Գագիկ Գյուրջյանը։
«Մենք նպատակ ունենք հանրությանը ներկայացնել բոլոր այն ծրագրերը, որոնց մեկնարկը տրվլ է դեռևս մի քանի տարի առաջ։ Այս տարի «Էրեբունի» պատմահնագիտական արգելոց-թանգարանի Էրեբունի հնավայրը կունենա իր ավարտուն նախագիծը։ Այս տարվանից ձեռնամուխ կլինենք վերականգնողական և շինարարական աշխատանքների իրականացմանը։ Կփորձենք անել այնպես, որ Էրեբունի-Երևանի 2800-ամյակը հնարավորինս պատշաճ դիմավորենք, այդ իսկ պատճառով մինչև 2018 թվականի հոկտեմբեր ամիսը անհրաժեշտ կլինի շատ լարված աշխատել»,- ասաց Գագիկ Գյուրջյանը:
Նրա խոսքով` միջնաբերդի, պալատական կառույցների, կարասային սրահի, Խալդ աստծո տաճարի, ամֆիթատրոնի, ուրարտական ոհանոցի էսքիզային նախագծերն ընթացքի մեջ են, իսկ ցանկապատի և պահակակետերի աշխատանքային նախագիծն արդեն պատրաստ է։

«Երևաննախագիծ» ՓԲԸ-ի տնօրեն Սիրեկան Օհանյանն էլ իր հերթին ասաց, որ իրենց աշխատանքները կապված են հնագիտական արգելոց- թանգարանի աշխատանքների բարելավման և աջակցման հետ։
Իրականացվող բոլոր ծրագրերը կապված են Երևան քաղաքի զբոսաշրջության զարգացման հեռանկարների հետ։
«Քաղաքի կամ երկրի զբոսաշրջային զարգացման հիմնական բնութագիրը, որը շատ ավելի ճանաչված է միջազգային կազմկերպություններում՝ պատմական վիճակի ճանաչողական, ցուցադրական ներկայացումն է: Երեք հնագիտական բնակավայրերը՝ Էրեբունի պատմահնագիտական արգելոց-թանգարանը, Կարմիր բլուր ու Շենգավիթ հնավայրերն ընդգրկված են Երևանի զբոսաշրջային զարգացման ընդհանուր ծրագրերի մեջ»,- անդրադառնալով այդ երեք հնավայրերին` նշեց Սիրեկան Օհանյանը:
«Երևաննախագիծ» ՓԲԸ տնօրենը տեղեկացրեց, որ Շենգավիթ հնավայրի վերականգնողական աշխատանքների համար հարկավոր է 2 մլն դոլարի ներդրում, Կարմիր բլուրի համար՝ 3 մլն դոլարի, իսկ Էրեբունի հնավայրի համար՝ 8 մլն դոլար ի:
Ֆինանսական հնարավորություններ չունենալու պատճառով որոշում է կայացվել վերականգնողական աշխատանքների մեջ մասնավորի բաղադրիչը ևս մտցնել:
Վերականգնման աշխատանքների արդյունքում կբարելավվի հնավայրերի տարածքը, գրադարանների, գրապահոցների, հնագիտական նմուշների վերականգնումից բացի, հատուկ սրճարան ու հուշանվերների խանութ կլինի, նաև տեղ՝ բեմադրություններ և ցուցադրություններ կազմակերպելու համար: