Վահրամ Սահակյանը՝ բնակարանների մասին. «Դա ինտելիգենտ մարդու խոսակցություն չէ»

Ինչպես հայտնի է, հոկտեմբերի 8-ին գումարվելու է  Երևանի ավագանու արտահերթ նիստ, որի ժամանակ կքննարկվի հաղորդադավարուհի Զառա Արամյանին, երգիչ-երգահան Դավիթ Ամալյանին, գրող Վահրամ Սահակյանին և Ալ. Սպենդիարյանի անվան օպերայի և բալետի ազգային ակադեմիական թատրոնի մեներգիչ Բերջ Քարազյանին բնակարան նվիրելու հարցը:

Քաղաքապետարանի որոշումը մեծ աղմուկ է բարձրացրել համացանցում, հատկապես Զառա Արամյանի՝ վերջերս սահմանամերձ գյուղերում ապրելու հետ կապված հայտարարության համատեքստում: Համացանցի որոշ օգտատերեր կարծում են, որ բնակարան կարելի է տրամադրել ավելի կարիքավոր կամ ավելի վաստակավոր մարդկանց:

Past.am-ի հետ զրույցում գրող Վահրամ Սահակյանը նշեց, որ բնակության վայրի և այլ տիպի ընտանեկան հարցերը համարում է անձնական՝ գերադասելով չխոսել դրանց մասին:

«Ես գիտեմ, որ այդ շենքերի բնակիչները, որտեղ բնակարաններ են տրամադրվել, անօթևան մարդիկ են: Այդ մարդիկ ապրել են վթարային շենքերում: Ես համարում եմ, որ գռեհկություն է անձնական հարցերը հրապարակավ քննարկելը: Ես այդ տիպի խոսակցությունների հեղինակների հետ չեմ շփվում: Դա ինտելիգենտ մարդու խոսակցություն չէ»,- ասաց գրողը:

Լևոն Փանոսյան