Նա չի ազատվում անցյալից, որը խառնել է իր ողջ հոգեկան աշխարհը. Սիլվի Բարկովա

 Life.panorama.am-ը գրում է.

«Դեպի վայրէջք» 25 մասանի ֆիլմի դերասանական անձնակազմից մի քանիսի հետ Life.panorama.am-ն արդեն զրուցել է: Այսօր խոսել ենք այս ֆիլմում ներգրավված դերաասանուհի Սիլվի Բարկովայի հետ, ում վերջերս հեռուստդիտողը տեսնում է «Դոմինո» սիթքոմում:

Թրաֆիքինգի զոհ դաձած կանանց մասին պատմող այս ֆիլմում Սիլվին մարմնավորում է այդ սարսափելի երեւույթից տուժած կնոջ, ով, ի վերջո, ինքնասպան է  լինում.

«Ինչպես հայտնի է՝ նախագծի թեման թրաֆիքինգն է։ Ես էլ այնտեղ ներգրավված եմ՝ որպես թրաֆիքինգի զոհ դարձած եւ մի կերպ Հայաստան փախչած աղջկա, ով շատ բարդ ճանապարհ է անցել»,- պատմեց Սիլվի Բարկովան ու շարունակեց.

«Իմ մարմնավորած հերոսուհին Էլիզն է։ Չնայած նրան, որ իրեն հաջողվել է վերդառնալ հայրենիք, միեւնույնն է, նա չի ազատվում անցյալից, որը խառնել է նրա ողջ հոգեկան աշխարհը։ Դրան գումարած՝ նրա հարազատ եղբայները երես են թեքել նրանից եւ ամաչելով քրոջ անցյալից` հեռացել Հայաստանից։ Ի վերջո այս աղջիկը ինքնասպան է լինում»։

Մեզ հետ զրույցում դերասանուհին նշեց, որ «Դեպի վայրէջք» ֆիլմում նկարահանվելու առաջարկը շատ արագ է ընդունել.

«Առաջարկը ստանալուց հետո, շատ հապճեպ որոշում կայացրի: Ինձ զանգահարեց Ելենա Արշակյանի օգնականը եւ ասաց, որ իրենց նոր պրոեկտում մի դեր կա, որի համար երկար են մտածել, թե ով կարող է խաղալ այդ բարդ հոգեբանական կերպարը, եւ ի վերջո հանգել են իմ տարբերակի վրա։ Այդ կարծիքն իմ մասին, իհարկե, պարտավորեցնող էր»,- նշեց նա:։

Սիլվիի խոսքով՝ դեռեւս մեկ նկարահանման օր է ունեցել.

«Թիմն, իսկապես, շատ լավն է, ու այդ պատճառով թիմային աշխատանքը շատ լավ  անցավ: Չնայած ծավալուն աշխատանքին՝ ամեն բան հարթ ու խաղաղ մթնոլորտում է կայանում»:

Ի դեպ՝ հետաքրքրվելով, թե սիթքոմից հետո միանգամից նման լուրջ, հոգեբանական կերպարի անցնելը դժվար չէ՞ր, պատասխանեց.

«Իհարկե, ոչ, ընդհակառակը՝ հեշտ էր։ Ես ժանրային նախապատվություն չունեմ՝ խաղարկային բոլոր ժանրերն էլ սիրում եմ»։

Իսկ զրույցի վերջում դերասանուհին հավելեց, որ առաջիկայում նոր աշխատանքներ եւս կլինեն, միայն թե այդ մասին ցանկացավ ավելի ուշ խոսել: