Հայկական շոուբիզնեսի ծագող աստղը. «Շուտով կլսեք իմ անունը»

Սկսնակ երգիչ Արս Սենը, ով դեռ ընդամենը 16 տարեկան է, իր առաջին քայլերն է անում հայկական շոուբիզնեսում:

«Երգում եմ փոքրուց, սակայն ավելի մասնագիտացված երգով զբաղվում եմ 10 տարեկանից: 11 տարեկանում ընդունվեցի Սուսաննա Պետրոսյանի վոկալի խմբակ, սակայն կարճ ժամանակ հետո դուրս եկա», - Past.am-ի հետ զրույցում նշեց երիտասարդ երգիչը:

Ներկայումս Արս Սենը երգչուհի, «Շանթ» հեռուստաընկերության «Պրեմիերա» նախագծի հաղթող Նարե Գևորգյանի սանն է.

«Նարեին ճանաչում էի շատ վաղուց՝ որպես հիանալի երգչուհի: Նրա մոտ պարապում եմ մոտ 2 տարի, և մեր հարաբերությունները չեն սահմանափակվում միայն աշակերտ - ուսուցիչ կարգավիճակով: Նարեն իմ ավագ ընկերն է, և ես նրան անչափ սիրում եմ»:

Արս Սենի խոսքով՝ երգիչ դառնալն իր համար փոքրուց նպատակ է եղել, որին հիմա հասել է: Ժանրերի առումով դեռ կոնկրետ որոշում չունի, երգում և իրեն փարձում է ամենատարբեր ոճերում: Սկսնակ երգչի ոգեշնչման աղբյուրն են Բրունո Մարսը, Սեմ Սմիթը, Ջասթին Բիբերը և ուրիշներ.

«Ինձ թվում է՝ ես արդեն ինչ-որ չափով պատրաստ եմ բարձրանալ բեմ և ներկայանալ իմ հանդիսատեսին: Վերջերս յութուբում տեղադրված հոլովակս կարճ ժամանակում բավականին դիտումներ է հավաքել, ինստագրամում հետևորդներիս թիվն ավելացել է: Նույնիսկ վերջերս մի քանի դեպք է եղել, երբ փողոցում ցանկացել են հետս լուսանկարվել: )) Կարծում եմ՝ շուտով կլսեք իմ անունը»:

 

Մարիամ Նալբանդյան