​Օրական քանի՞ ձու կարելի է ուտել, որպեսզի չվտանգեք առողջությունը

Ankakh.com-ը գրում է.

Արդեն Զատկի տոնն է: Ու հանաք բան չէ, իսկական ձվակռվի շրջան, որն ավարտվում է հաղթողների առատ ձվակերությամբ: Հետաքրքիր է, շատերն են խոստովանում, որ հատկապես Զատկի ձուն արտակարգ համեղ է, չես բավարարվում 1-2 հատով: Իսկ հետո, փաստորեն, ստիպված ենք համակերպվել հետևանքների հետ:

Քանի՞ ձու կարելի է ուտել, պետք է միայն սպիտակո՞ւցն ուտել, թե՞ ձուն ամբողջությամբ: Շատերը կարծում են, որ կարելի է օրական 3-4 ձու ուտել, ոչ ավելի, հակառակ պարագայում կբարձրանա խոլեստերինը, ինչն իր հերթին կհանգեցնի սիրտ-անոթային հիվանդությունների:

Նման կարծիքի աղբյուրները հայտնի են. յուրաքանչյուր ձու իսկապես 200 մգ խոլեստերին է պարունակում ու 5 գ ճարպեր: Սակայն ձվի գործածումը, քանի ձու էլ ուտելու լինենք, կապ չունի խոլեստերինի մակարդակի բարձրացման հետ:

Հիշենք խոլեստերինի օգուտի ու վնասի մասին

Խոլեստերինն անհրաժեշտ է իմունային գործառույթների ու մի քանի հորմոնների մշակման համար, ինչպիսիք են կորտիզոլն ու տեստոստերոնը: Առողջ մարդու լյարդն ամեն օր ավելի շատ խոլեստերին է արտադրում, քան մի քանի ձու ուտելուց կարող է բարձրանալ:

Խոլեստերինի բարձր մակարդակն իսկապես լավ չէ օրգանիզմի համար, սակայն դրանում ձվի բաժինն անքան էլ մեծ չէ: Հետազոտություններով պարզվել է, որ հավի ձուն չի բարձրացնում վատ խոլեստերինի մակարդակը. օրգանիզմը հարմարվում է սննդակարգին ու նվազ քանակությամբ խոլեստերին է արտադրում:

Ձվի ազդեցությունը խոլեստերինի մակարդակի վրա

Գիտական բազում ուսումնասիրություններ են կատարվել, որոնք ցույց են տվել, որ առողջ մարդու օրգանիզմում 3 ձվի գործածությունից (օրական) խոլեստերինի ընդհանուր մակարդակի փոփոխություն չի կատարվում (թե՛ լավ և թե՛ վատ խոլեստերինի մասին է խոսքը): Ընդ որում, հաջողվել է պարզել, որ հավի ձուն բարձրացնում է լավ խոլեստերինի մակարդակը:

Ի՞նչն է օգտակար, սպիտակո՞ւցը, թե դեղնուցը

Հաջորդ տարածված կարծիքն այն է, որ պետք է ուտել միայն սպիտակուցը, քանի որ հենց դեղնուցում է առողջության համար վնասակար խոլեստերինը: Այս դեպքում ավելի լավ կլինի մտածել մյուս մթերքների վնասակարության մասին, օրինակ՝ մսամթերքի ու կիսապատրաստվածքների:

Դեղնուցի մեջ իմունիտետի համար օգտակար ճարպալույծ A, D և E վիտամիներ կան, մինչդեռ սպիտակուցում դրանք չկան: Դեղնուցի գույնը պայմանավորված է հակաօքսիդանտներով՝ նյութեր, որոնք շատ կարևոր են ազատ ռադիկալների դեմ պայքարելու և լավ տեսողություն ունենալու համար:

Ձվի բաղադրությունն ու կալորիականությունը

50 գ քաշով մեկ պինդ խաշած ձուն մոտ 75 կալորիա է պարունակում, 5 գ ճարպ (որից 1,9 գ-ը մոնոչհագեցած ճարպաթթուներ են, 1,5 գ-ը՝ հագեցած), 0,5 գ ածխաջրեր ու 6,5 գ սպիտակուցներ: Բացի այդ, մեկ ձուն կալցիումի օրական նորմի 3%-ն է պարունակում, ցինկի՝ 4%-ը և երկաթի՝ 5 %-ը:

Հո՞ւմ, թե խաշած

Շատերը համոզված են, որ հում ձուն ամենաօգտակարն է: Այս կարծիքն առողջ վերլուծությամբ քննություն չի բռնում: Բանն այն է, որ հում սպիտակուցը ծանրաբեռնում է ստամոքսը, հետևաբար այն դժվար է յուրացվում, էլ չասած սալմոնելոզով հիվանդանալու վտանգը:

Նախընտրելի է, իհարկե, ջերմամշակման ենթարկված մթերքը: Ու մի մոռացեք օգտագործելուց առաջ ձուն տաք ջրով լվանալու անհրաժեշտության մասին. այդպես կարելի է այն անվտանգ դարձնել:

Ձվի առավելագույն քանակը

Ապացուցվել է, որ օրական 3 ձուն բացասական ազդեցություն չի թողնում առողջ մարդու օրգանիզմի վրա: Սակայն չի կարելի ասել, թե ինչ հետևանքներ կունենա այդ քանակը չարաշահելը:

Եվ չմոռանանք այն փաստը, որ տարբեր թռչնաֆաբրիկաներում տարբեր կերպ են բուժում թռչուններին: Դրանք գրեթե անշարժ դիրքում են գտնվում, ինչը, բնականաբար, ազդում է ձվի բաղադրության վրա (առաջին հերթին՝ ճարպաթթուների): Ուստի նախընտրելի է «զբոսանքի» հնարավորություն ունեցող թռչունների «արտադրանքը»:

Պրոտեինի ու օգտակար ճարպերի շնորհիվ հավի ձուն ամենաօգտակար մթերքների շարքը կարելի է դասել: Դրանց վնասակարության մասին ենթադրությունները դեռևս ապացույցներ չունեն:

Ինչո՞վ է պայմանավորված ձվի կճեպի գույնը

Գույնը պայմանավորված է ածան հավի ցեղատեսակով: Հետաքրքրական է, որ սպիտակ ականջաբլթակներով հավերը հիմնականում սպիտակ ձու են ածում, իսկ կարմիր բլթակներովը՝ շագանակագույն ձու:

Բայց ո՞րն է լավը: Շատ տնտեսուհիների է հետաքրքրում այս հարցը: Իրականում տարբերություն չկա շագանակագույն և սպիտակ կճեպով ձվերի մեջ. գույնը սննդարար արժեքի, համի ու որակի վրա չի ազդում: Կապ չունի նաև ձվի թարմության հետ: Սակայն պետք է նշել, որ շագանակագույն կճեպն ավելի հաստ է (ի դեպ, այդ ձվի մեջ հաճախ է արյան հետք հանդիպում. արյան հետքով ձուն պիտանի է ուտելու համար ու անվտանգ է): Այդ հաստ կճեպի շնորհիվ շագանակագույն ձուն ավելի երկար կարելի է պահպանել:

Ձվի թարմությունը որոշելու համար պետք է վրան սառը ջուր լցնել. եթե ձուն ջրի երես է բարձրանում, ուրեմն հին է, իսկ հատակին մնացած ձուն թարմ է: Թարմ ձուն նաև դժվարությամբ է մաքրվում:

Ի դեպ, ամենից շատ ձու են օգտագործում Մեքսիկայում: Ըստ տվյալների՝ երկրի յուրաքանչյուր բնակիչ տարեկան մոտ 21,9 կգ ձու է օգտագործում, օրական կտրվածքով՝ մոտ մեկուկես ձու: Առաջ Ճապոնիան էր այդ տեղում. տարեկան յուրաքանչյուր ճապոնացի 320 ձու էր սպառում, այսինքն՝ գրեթե ամեն օր՝ մեկ ձու:

Շարունակությունն՝ այստեղ