Արծվիկ Մինասյանը չի տեսնում Բնապահպանության նախարարի պաշտոնը լքելու որևէ պատճառ

Բնապահպանության նախարար, ՀՅ Դաշնակցության անդամ Արծվիկ Մինասյանն իրեն տեսնում է նոր կառավարության կազմում և մտադիր է շարունակել պաշտոնավորումը Բնապահպանության նախարարի պաշտոնում: Այս մասին նշեց Մինասյանը ապրիլի 15-ին լրագրողների հետ զրույցում՝ պատասխանելով հարցին՝ տեսնում է իրեն նոր կառավարության կազմում:

«Կարծում եմ, ներկայումս չկա որևէ պատճառ հակառակը պնդելու, մանավանդ, որ մենք հիմա ՀՀԿ-ի հետ քննարկումների փուլում ենք, իսկ սա այն ոլորտն է, որը ոչ միայն Դաշնակցության, այլև մեր գործընկեր Հանրապետական կուսակցության և առաջին հերթին հանրապետության  նախագահի  համար կարևորագույն, հիմնարար ոլորտներից է»,-«Արմենպրես»-ի հաղորդմամբ՝ նշեց Մինասյանը:

Հայաստանում ապրիլի 2-ին անցկացվել են Ազգային ժողովի ընտրություններ, որոնց արդյունքներով նոր խորհրդարանը կձևավորեն չորս ուժեր՝ ՀՀԿ-ն, «Ծառուկյան», «Ելք» դաշինքները և ՀՅ Դաշնակցությունը: ՀՀԿ-ն և ՀՅԴ-ն արդեն պաշտոնապես հայտարարել են, որ քննարկումների փուլում են՝ հստակեցնելու համագործակցության ձևաչափը: Նոր Ազգային ժողովի առաջին նիստի օրը ՀՀ կառավարու թյունը հրաժարական կտա: Դրանից հետո 10 օրվա ընթացքում ՀՀ Նախագահը, խորհրդակցելով խորհրդարանական խմբակցությունների հետ, վարչապետ կնշանակի այն անձին, ով վայելում է պատգամավորների մեծամասնության աջակցությունը: Վարչապետի նշանակումից հետո 20-օրյա ժամկետում պետք է ձևավորվի նոր կառավարությունը: Այսինքն, վարչապետի առաջարկությամբ ՀՀ Նախագահը նշանակելու է նախարարների: Դրանից հետո 20 օրվա ընթացքում նոր ձևավորված կառավարությունը  պետք է Ազգային ժողովի քննարկմանը ներկայացնի իր ծրագիրը: