Թուրքիայի քրդամետ կուսակցության համանախագահը դատապարտվել է 1 տարվա ազատազրկման

ՄԻՋԱԶԳԱՅԻՆ 11 Ապրիլ, 2017 21:14

Ստամբուլի 22-րդ ծանր հանցագործությունների դատարանը Թուրքիայի քրդամետ Ժողովուրդների դեմոկրատական կուսակցության (HDP) համանախագահ Ֆիգեն Յուքսեքդաղի վերաբերյալ վճիռ է կայացրել:

Այս մասին հայտնում է թուրքական Diken լրատվական գործակալությունը:

Դատարանի վճռով Ֆիգեն Յուքսեքդաղը դատապարտվել է 1 տարվա ազատազրկման:
Քրդամետ կուսակցության համանախագահն, ի թիվս այլ մեղադրանքների մեղադրվում է ահաբեկչական կազմակերպության քարոզչություն իրականացնելու հատկանիշներով, ինչի շուրջ էլ ընթացել է դատավարությունը:

Յուքսեքդաղի նկատմամբ առաջադրված են նաև հանրահավաքների և ցույցերի վերաբերյալ օրենքը խախտելու, հասարակության մեջ ատելություն սերմանելու, հանցագործություն կազմակերպելու և ահաբեկչական կազմակերպության անդամ լինելու հատկանիշներով մեղադրանքներ, որոնց համար թուրքական օրենսդրությամբ նախատեսվում է 30-ից 83 տարվա ազատազրկում:

Թուրքական տարբեր դատարաններում Յուքսեքդաղի նկատմամբ առաջադրված մյուս մեղադրանքների շուրջ դատավարությունները շարունակվում են:

Թուրքիայի քրդամետ Ժողովուրդների դեմոկրատական կուսակցության համանախագահներ Սելահաթթին Դեմիրթաշը և Ֆիգեն Յուքսեքդաղը, ինչպես նաև կուսակցության անդամ ևս 9 պատգամավոր նոյեմբերի 4-ին ձերբակալվել էին, ինչը աշխարհում մեծ արձագանք էր գտել:

2017-ի փետրվարի 21-ին Յուքսեքդաղը զրկվել է պատգամավորական մանդատից, իսկ մարտի 9-ին կուսակցության անդամ լինելու իրավունքից: