Ճապոնիայի վարչապետը համտեսել է «ֆուկուսիմա-1»-ի շուրջը օտարված նախկին գոտու ֆերմայի կաթը

Ճապոնիայի վարչապետ Սինձո Աբեն թարմ կաթ է համտեսել ֆերմայում, որը գտնվում է «Ֆուկուսիմա-1» ԱԷԿ-ի շուրջը օտարված նախկին գոտում: Նարահա քաղաքը ընդամենը 20 կմ է հեռու վթարված կայանից, որտեղ վարչապետն այցելել է երկրի տարերային աղետներից տուժած շրջաններ իր պարբերական ուղեւորություններից մեկի շրջանակում, փոխանցում է ՏԱՍՍ-ը:

ԱԷԿ-ում վթարից հետո այս շրջանից գյուղատնտեսական արտադրանքի, այդ թվում՝ կաթնամթերքի մատակարարումներն արգելված էին: Մատակարարումը վերականգնվել է միայն հինգ ու կես տարի հետո՝ այս տարվա հունվարին, երբ վաճառահանվել է Նարահայի ֆերմայի 18 կովերի կաթը:

Անցյալ տարի այս ֆերմայի մթերքները պետական մանրակրկիտ ստուգում են անցել: Մայիսից դեկտեմբեր ամեն շաբաթ կաթի մեջ չափել են ռադիոակտիվ ցեզիումը, որի մեջ ոչ մի անգամ իշխանությունների սահմանած կիլոգրամին 50 բեկերել նորման չի գերազանցվել: Ցուցանիշները նույնիսկ ցածր էին նվազագհույն մակարդակից, որը կարող է գրանցել չափող սարքը:

Երբ վարչապետն այցելել է ֆերմա, արտադրողները հայտնել են իրենց արտադրանքի ստուգման արդյունքների մասին եւ նրան առաջարկել են համտեսել գրեթե տաք կաթը: Աբեն ընդունել է, որ այն «շատ թարմ է եւ համեղ»: «Մենք ցանկանում ենք ձեզ աջակցել, որ վաճառքի շուկան ընդլայնեք եւ փոխհատուցեք վնասները, որը կրել եք ասեկոսեների պատճառով»,- ասել է նա:

«Ֆուկուսիմա-1» ԱԷԿ-ում վթարը տեղի է ունեցվել 2011 թվականի մարտին, երբ ցունամիի հետեւանքով կայանում շարքից դուրս են եկել  էներգամատակարարման եւ հովացման համակարգերը: Արդյունքում երեք էներգաբլոկներում տեղի է ունեցել վառելիքի հալում, որն այրել է ռեակտորների պաշտպանիչ պատյանները: Սա ուղեկցվել է ջրածնի պայթյուններով եւ մեծ ծավալի ռադիոակտիվ նյութի արտանետմամբ, ինչն էլ հանգեցրել է կայանին հարակից շրջանի վարակման: Ներկայումս կայանում վնասազերծման աշխատանքներ են կատարվում, շարունակվում է տուժած տարածքների ապաակտիվացումը: