Սիրիայում ընթացող պայքարը նմանվում է փոքրիկ համաշխարհային պատերազմի. Մուշեղ Խուդավերդյան

Թուրքագետ Մուշեղ Խուդավերդյանն այսօր լրագրողների հետ զրույցում նշել է որ, Սիրիայում ընթացող պայքարը նմանվում է փոքրիկ համաշխարհային պատերազմի և ռազմական պայքար են մղում ՆԱՏՕ-ի եւ արեւելյան երկրները: Այս մասին հայտնում է Past.am-ը:

Ըստ նրա՝ Թուրքիան այդ առումով հետաքրքիր կեցվածք է որդեգրել, նա հասկանում է, որ եթե չսպասարկի Սիրիայում ՆԱՏՕ-ի շահերը, ապա մեկ օր էլ չի մնա ՆԱՏՕ-ում: Սիրիական, ըստ Խուդավերդյանի, թնջուկը վտանգավոր է նաև Հայաստանի համար, քանի որ Սիրիայում հայ համայնքը պառակտվում եւ ոչնչանում է, քանդվում են հայկական եկեղեցիները: Բանախոսն ընդգծեց ծայրահեղականների համար Հայաստանն անցանկալի երկիր է, քանի որ քրիստոնյա է: Մ. Խուդավերդյանը նաև ավելացրեց, որ ընթացող զարգացումները Հայաստանի վրա ազդելու են այն առումով, որ սիրիահայերի հոսքը ավելի է շատանալու, ինչը Հայաստանի համար տնտեսական դժվարություններ կարող է ստեղծել:

«Ժնևյան բանակցությունները փորձում են կոծկել առկա ռազմական գործողությունների խելահեղությունը, սակայն եթե հասնում են բանակցային համաձայնության, ապա մեկ-երկու ամիս անց խախտում են այդ համաձայնությունը»,- ասաց նա ՝ նշելով, որ ԱՄՆ-ի կողմից ռմբակոծումը հենց ցույց տվեց, որ Ժնևյան բանակցությունները ինչ-որ առումով կորցրել են իրենց իմաստը: «Քիմիական զենքի առկայության վերաբերյալ լուրերը դեռ հաստատ չեն, ռուս-ամերիկյան հարաբերությունները Սիրիայի հարցում լարված են: ԱՄՆ-ն մշտապես փորձելու է ընդլայնել իր ազդեցությունը ի հաշիվ Ռուսաստանի ազդեցության գոտիների, ինչի հետեւանքով ռուս-ամերիկյան հարաբերությունները մշտապես լարված կլինեն:

Ժնևյան բանակցություններն իմիտացիա են նրա, որ կողմերը հաշտության են գալիս, սակայն ԱՄՆ-ի կողմից ռմբակոծությունը չի խոսում այն մասին, որ առաջիկայում հաշտության եզրեր առկա են և լարվածությունը խորանալու վտանգ կա»,- կարծիք հայտնեց Մ.Խուդավերդյանը:

Լևոն Փանոսյան