Հայաստանն ու Լիտվան փոխճանաչման նոր հարթակ ունեն. «Արմենպրես»-ն ու «Էլտա»- ն ստորագրեցին համաձայնագիր

Հայաստանի և Լիտվիայի ազգային լրատվական գործակալությունները՝ «Արմենպրես»-ը և «Էլտա»-ն, ստորագրել են համագործակցության համաձայնագիր, որը հնարավորություն կտա երկու գործակալությունների միջև ակտիվացնել տեղեկատվական փոխանակումը և մասնագիտական գործակցությունը: Ինչպես հաղորդում է «Արմենպրես»-ի թղթակիցը Վիլնյուսից, փաստաթուղթն ստորագրել են «Արմենպրես»-ի տնօրեն Արամ Անանյանը և «Էլտա»-ի գլխավոր տնօրեն Ռոմաս Բուբնելիսը:

«Միջազգային համագործակցության ընդլայնման առումով 2017 թվականը բեղուն տարի է և Լիտվայի ազգային լրատվական գործակալության հետ ստորագրված համագործակցության համաձայնագիրը գալիս է համալրելու համագործակցող լրատվական միավորների այն ընդլայնված ցանցը, որ մենք ձևավորում ենք: Կարծում եմ, որ համագործակցությունը կոնկրետ արդյունքներ կտա երկու հասարակություններում միմյանց փոխճանաչման բարձրացման առումով»,-նշում է «Արմենպրես»-ի տնօրեն Արամ Անանյանը:

Հայաստանի և Լիտվայի ազգային լրատվական գործակալությունների ղեկավարները մեծապես կարևորել են փաստաթղթի ստորագրումը՝ այն բազմաթիվ համատեղ ծրագրերի  լավ հիմք համարելով: Նրանք պատրաստակամություն են հայտնել փորձի փոխանակման փոխհարստացնող միջոցառումների անցկացման:

Ռիգայում ապրիլի 4-ին «Արմենպրես»-ը համագործակցության համաձայնագիր է ստորագրել Լատվիայի ազգային լրատվական «Լետա» գործակալության հետ: Իսկ մարտի 11-ին Երևանում գործակցության հիմքերն ամրապնդվել են իսպանական EFE-ի հետ ստորագրված փոխըմբռնման հուշագրով:

«Արմենպրես» լրատվական գործակալությունը հիմնադրվել է 1918 թվականի դեկտեմբերի 18-ին: Այն պետական լրատվամիջոց է: Գործակալությունն ամենահինն է Հայաստանում: Ներկայում թողարկում է տասնմեկ լրատվական ժապավեն` 4 լեզուներով: «Արմենպրես»-ը աշխարհի ավելի քան 20 առաջատար լրատվական գործակալությունների հետ ունի երկկողմ գործակցության պայմանագրեր, որոնց շուրջ մեկ երրորդը կնքվել է վերջին հինգ տարիներին:

«Էլտա»-ն բալթյան խոշորագույն լրատվական գործակալություններից մեկն է, որն ապահովում է բալթյան տարածաշրջանի քաղաքական, տնտեսական, սոցիալական, մշակութային կյանքի մասին բազմալեզու տեղեկատվություն։ Այն հիմնադրվել է 1920 թվականին: