«Վերածնունդ» մրցույթ-փառատոնում հանդես կգան փորձառու և սկսնակ կատարողներ

 Հայ դասական երաժշտության «Վերածնունդ» IX միջազգային մրցույթ-փառատոնն այս տարի մեկնարկում է ապրիլի 12-ին: Մասնակցելու են ավելի քան 3 000 անհատ կատարողներ և համույթներ շուրջ 35 երկրից, ՀՀ բոլոր մարզերից, ԼՂՀ-ից:

«Արմենպրես»-ի հաղորդմամբ`ժյուրիի կազմում ընդգրկված են 72 նշանավոր արվեստագետներ 14 երկրից, այդ թվում՝ ԱՄՆ-ից, ՌԴ-ից, Ավստրիայից, ՉԺՀ-ից, Իտալիայից, Արաբական Էմիրություններից:

Իրականացրած աշխատանքների արդյունքում «Վերածնունդ» միջազգային մրցույթ-փառատոնը դարձել է ոչ միայն ՀՀ, այլև տարածաշրջանի և ԱՊՀ երկրների ամենասիրված, ամենամասսայական մշակութային իրադարձություններից մեկը, որը նպաստում է արվեստի գործիչների միջոցով երկրների միջև միջազգային մշակութային երկխոսության և ընդհանուր մշակութային տարածքի զարգացմանը, բարեկամական և ստեղծագործական կապերի ամրապնդմանը, հայ դասական երաժշտության քարոզչությանը:

«Վերածնունդ» միջազգային մրցույթ-փառատոնը, կրթական ու մշակութային նշանակությանը զուգընթաց, նաև կարևոր կոչ է ուղղում աշխարհին՝ ոչ ասելու ահաբեկչություններին ու պատերազմներին, որոնք տակավին շարունակում են ալեկոծել մարդկային կյանքերը՝ պատճառ դառնալով անհամար կորուստների: Ավանդական դարձած այս փառատոնի կազմակերպումը հատուկ արժեվորում է ստանում այս տարի, երբ նշվում է ԱՄՆ, ՌԴ, Ֆրանսիայի, Գերմանիայի, Չինաստանի, Ճապոնիայի, Իտալիայի և մի շարք այլ երկրների հետ դիվանագիտական հարաբերությունների հաստատման 25-ամյակը:

Սկսնակ և կայացած երաժիշտների համատեղ ելույթները հավաստելու են հայ ժողովրդի ստեղծարար ուժի անպարտելիության և համամարդկային արժեքներին ձգտելու հաստատակամության մասին:

Մրցույթ-փառատոնն անցկացվում է ՀՀ մշակույթի նախարարության, Երևանի պետական կոնսերվատորիայի Գյումրու մասնաճյուղի, «Փյունիկ» մարդկային ռեսուրսների զարգացման համահայկական հիմնադրամի և «Վերածնունդ միջազգային մրցույթ-փառատոն» ՀԿ-ի նախաձեռնությամբ: