Ռոդրիգո Դուտերտեն արտաամուսնական հարաբերությունների կողմնակիցն է

 Ֆիլիպինների նախագահ Ռոդրիգո Դուտերտեն աջակցել է իր մտերիմ ընկեր ու քաղաքական դաշնակից Պանտալեոն Ալվարեսին՝ Ներկայացուցիչների պալատի խոսնակին, որը խոստովանել է, որ արտաամուսնական կապեր է ունեցել, հայտնում է South China Morning Post–ն։

«Սա երեսպաշտների աշխարհ է։ Այստեղ ներկա գտնվողներից ո՞ր մեկը սիրուհի չի ունեցել»,- ասել է նախագահը։

Պարբերականը նաեւ նշում է, որ Դուտերտեն իր առաջին կնոջից բաժանվել է։ Հիմա նա երկարատեւ հարաբերությունների մեջ է Հոնեյլեթ Ավանսենա անունով մի կնոջ հետ։ Ընդ որում 72-ամյա նախագահը բացահայտ խոստովանում է, որ ունեցել է սիրուհիներ։

Անցած շաբաթ Ալվարեսը խոստովանել էր, որ իր ութ երեխաներից երկուսը իր կնոջից են, իսկ մնացածը՝ ուրիշ կանանցից։

Դուտերտեն այդ հայտարարությունը շովինիստական է անվանել, միաժամանակ հավելել․ «Աշխարհում այնքան շատ կանայք կան ու այնքան քիչ ժամանակ։ Գլխավորը, որը ստեղծված իրավիճակում դու կարողանաս օգնել քո երեխաներին»։

Նախագահը նաեւ հավելել է, որ ի տարբերություն ֆիլիպինցիների մեծ մասի, որը քրիստոնեություն է դավանում, Ալվարեսը կնքված չէ, դրա համար մեկ կին ունենալու կանոնը նրա վրա չի տարածվում։

Նախագահի ընդդիմախոսները քննադատել են նրան այդ հայտարարության համար, նշելով, որ մուսուլմաններին թույլատրված է մի քանի կին ունենալ, սակայն ամուսնական դավաճանությունը հանցագործություն է համարվում։