ՀԿԿ առաջնորդ Տաճատ Սարգսյանն իր կուսակցության հաջողության հույս ունի

 Սուրեն Սպանդարյանի անվան թիվ 24 հիմնական դպրոցում տեղակայված 9/18 ընտրատեղամասում ապրիլի 2-ին իր քաղաքացիական պարտքը կատարեց Հայաստանի կոմունիստական կուսակցության առաջնորդ Տաճատ Սարգսյանը: Քվեարկելուց հետո լրագրողների հետ զրույցում նա հույս հայտնեց, որ ընտրությունների արդյունքներով իրենք հաջողություն կգրանցեն:

Սարգսյանը չմոռացավ շնորհակալություն հայտնել լրագրողներին: «Շնորհակալություն ենք հայտնում լրատվամիջոցներին մեր կուսակցության նկատմամբ բարեհաճ վերաբերմունքի համար: Ցանկանում եմ, որ դուք նման կերպ շարունակեք ձեր աշխատանքը»,-«Արմենպրես»-ի հաղորդմամբ` ասաց Սարգսյանը:

Նա նաև հաջողություն մաղթեց ընտրություններին մասնակցող բոլոր քաղաքական ուժերին:

Հայաստանի Ազգային ժողովի հերթական ընտրություններին մասնակցելու համար առաջադրվել է 9 քաղաքական ուժ, որոնցից 5-ը կուսակցություններ են, 4-ը` կուսակցությունների դաշինքներ: Ընտրություններին մասնակցում են Հայաստանի Հանրապետական, «Հայկական վերածնունդ», «Ազատ դեմոկրատներ», «Հայ Յեղափոխական Դաշնակցություն», Հայաստանի Կոմունիստական կուսակցությունները, ինչպես նաև «Ելք», «Ծառուկյան», «Օհանյան-Րաֆֆի-Օսկանյան» և «Կոնգրես-ՀԺԿ» դաշինքները:

ՀՀ ոստիկանության հրապարակած վերջին տվյալներով՝ ընտրելու իրավունք ունեցող քաղաքացիների ընդհանուր թիվն է` 2 միլիոն 564 հազար 195, հաշվառում չունեցող ընտրողների թիվը ` 915: Ստացիոնար բուժում իրականացնող բժշկական հաստատությունում գտնվող ընտրողների թիվն, ըստ տվյալների,  2001 է:

Տեղամասային ընտրական հանձնաժողովի անդամների թիվը` 28 հազար 277 է: Ընտրական տեղամասեր գործուղվել են ոստիկանության 197 ծառայողներ: Ազգային ժողովի ընտրությունները կլուսաբանի 120 լրատվամիջոց (89 տեղական և 31 միջազգային) և 55 դիտորդական կազմակերպություն: