Կարեն Ճշմարիտյանը կոչ է անում վստահել ՀԾԿՀ-ում խորհրդատվություն իրականացրած ընկերության եզրակացությանը

ՀՀ էկոնոմիկայի նախարար Կարեն Ճշմարիտյանը վստահում է «Դելոիթ և Տուշ» ընկերության կողմից Հանրային ծառայությունները կարգավորող հանձնաժողովում իրականացված խորհրդատվությանը, որի առաջին փուլի եզրակացության համաձայն՝ էլեկտրաէներգիայի սակագնի բարձրացումը համարվել է հիմնավոր: «Ես արդեն կասկածի չէի ենթարկի հիմնավորվածությունը, որովհետև այս ընկերությունը աշխարհի 4 այն ընկերութուններից է, որոնք մասնագիտորեն են մոտենում հարցին: Խորհուրդ կտայի հավատալ, որովհետև բարձր որակի կարողություններ ունեն»,- ասաց Ճշմարիտյանը:

Միաժամանակ, նախարարն ասաց, որ էլեկտրաէներգիայի սակագնի սուբսիդավորման հարցի հետ կապված մանրամասների չի տիրապետում, բայց իր համար հասկանալի է, որ ամսական 250 կվտ-ից ավելի էլեկտրաէներգիա սպառողների համար սակագնի տարբերությունը չի սուբսիդավորվի:

Հարցին՝ որքան էլեկտրաէներգիա է սպառում Ճշմարիտյանի ընտանիքը՝ նախարարը նշեց, որ 250 կվտ-ից մի փոքր ավելի. «Ես ընդհանրապես փոխհատուցումներին, սուբսիդիաներին այդքան էլ կողմ չեմ, բայց այստեղ սոցիալական խնդիր կա»:

Մինչ 2016 թվականի օգոստոսի մեկը ՏԱՇԻՐ ընկերությունը, որը գնել է ՀԵՑ-ը, և ՀՀ կառավարությունը համաֆինանսավորմամբ ամսական մինչև 250 կվտ էլեկտրաէներգիա սպառող քաղաքացիների և փոքր ու միջին ձեռներեցների համար կփոխհատուցեն էլեկտրաէներգիայի սակագնի բարձրացումը: