Երևանում հաջորդ տարի կմեկնարկեն չինական թեքումով միջնակարգ դպրոցի կառուցման աշխատանքները

Հայաստանում հաջորդ տարի կմեկնարկեն չինական թեքումով միջնակարգ դպրոցի կառուցման աշխատանքները: Այս մասին ԵՊԼՀ-ում չինարենի թարգմանչական լաբորատորիայի բացման արարողությունից հետո տեղեկացրեց ՀՀ-ում Չինաստանի Ժողովրդական Հանրապետության արտակարգ և լիազոր դեսպան Թիան Էրլունը:

«Դասավանդումը հիմնականում լինելու է հայկական կրթական ծրագրով: Հայկական դպրոց է լինելու, բայց մեկ տարբերությամբ` չինարեն է դասավանդվելու: Ղեկավարությունն իր վրա կվերցնի չինական կողմը` պրոֆեսիոնալ չինացի դասավանդողներով և չինարենի ուսուցման ծրագրով: Չինարենի դասավանդումը կիրականացվի դպրոցական տարիքից: Ես սա շատ եմ կարևորում լեզվի ուսումնասիրության հարցում»,-«Արմենպրես»-ի հարցին ի պատասխան` հավելեց Թիան Էրլունը:

Երևանի Զ. Սարկավագի 14 հասցեում գտնվող ուսումնական մասնաշենքի 38.4 քառակուսի մետր մակերեսով կաթսայատունը կապամոնտաժվի՝ դրա տեղում չինարենի խորացված դպրոց կառուցելու համար: Այս մասին որոշման նախագիծը հաստատվել է ՀՀ կառավարության փետրվարի 5-ի նիստում:

Հայաստանի և Չինաստանի կառավարությունների միջև 2012 թվականի դեկտեմբերի 28-ին և 2013 թվականի սեպտեմբերի 10-ին ստորագրվել են «Տեխնիկատնտեսական համագործակցության մասին» համաձայնագրեր, որոնցով չինական կողմը  Հայաստանին է տրամդրելու մոտ 27 մլն դոլարի անհատույց օգնություն: «Այդ միջոցներով էլ պետք է իրականացվի Երևանում չինարենի խորացված ուսուցմամբ դպրոցի շինարարությունը, որի ստեղծման վերաբերյալ պայմանավորվածությունը ձեռք է բերվել Հայաստանի Հանրապետության և Չինաստանի Ժողովրդական Հանրապետության նախագահների միջև 2010 թվականին կայաց ած հանդիպման ժամանակ»,- ասել է ԿԳ նախարար Արմեն Աշոտյանը: