Սա ոչ միայն ուսանելու վայր է, այլև արվեստագետների համար բաց դաշտ. Աբել Աբելյանն՝ իր նորաստեղծ արվեստի դպրոցի մասին

Դերասան, ռեժիսոր եւ պորդյուսեր Աբել Աբելյանը Life.panorama.am-ին պատմել է, որ մի քանի օր է, ինչ «Աբելյան արվեստի դպրոցն» իր դռներն է բացել արվեստասերների համար: Մեզ հետ զրույցում նա մանրամասնել է դպրոցի կարեւորության ու ծրագրերի մասին.

 

«Վերջին շրջանում իմ ողջ ուժերն ու միջոցները ներդրել եմ «Աբելյան արվեստի դպրոց»-ի հիմնման ու գործունեության վրա: Այստեղ բավականին լուրջ նախագծեր ենք իրականացնում եւ ապագայի համար էլ շատ ծրագրեր ունենք: Այս դպրոցն իր մեջ ներառում է նաեւ երկար ժամանակ գործող «Քասթինգ սքուլը»՝ Կինոյի եւ հեռուստատեսության դպրոցը: Հիմա մեր առաջնահերթ խնդիրն է ակտիվացնել նորաստեղծ «Մանկական զարգացման ծրագիրը»: Միաժամանակ՝ մեր դպրոցն իր գործունեությամբ ամեն բան անելու է, որպեսզի օգտակար լինի արվեստագետներին. Մենք պատրաստ ենք անվճար ու անշահախնդիր կերպով ցուցահանդեսներ կազմակերպել օրինակ նկարիչների համար, ովքեր ունեն հիանալի գործեր, սակայն ցուցահանդեսի հնարավորություն չունեն, պատրաստ ենք երաժիշտների համար կրկին անվճար կազմակերպել փոքրիկ համերգներ: Մենք պատրաստ ենք տարածք տրամադրել նաեւ տարատեսակ համերգենրի կամ ներկայացումների փորձերի համար:

Այսինքն՝ սա ոչ միայն ուսանելու վայր է, այլեւ արվեստագետների համար բաց դաշտ»,- պատմեց Աբել Աբելյանը:

Երվանդ Քոչար 17 հասցեում գտնվող «Աբելյան արվեստի դպրոց»-ն արդեն 20 օր է ինչ գործում է, բայց հստակ քայլերով փորձում է առաջ շարժվել՝ առաջարկելով խելամիտ ու շահեկան պայմաններ.

 

«Մեր դպրոցը զինված է նորաստեղծ տեխնիկայով, որոնք էլ ավելի շահեկան են դարձնում մեր աշխատանքը: Մեզ համար շատ կարեւոր է «Մանկական զարգացման ծրագիրը»: Սա նախատեսված է 5-11 տարեկան երեխաների համար, քանի որ իմ եւ շատերի խորին համոզմամբ՝ այս տարիքային փուլում երեխաները պարտադիր պետք է արվեստի որեւէ ճյուղում կամ ճյուղերում ինքնադրսեւորվեն: Եւ անգամ կապ չունի՝ հետագայում նա կդառնա պատգամավոր, նկարիչ, թե տնտեսագհետ, միեւնույն է, երեխայի մեջ արվեստի նկատմամբ սերն ու հետաքրքրություն առաջացնելը օգտակար է հենց նրա ընդհանուր զարգացման ու դաստիարակության համար: Ի դեպ՝ խոսքը միայն իմ դպրոցի մասին չէ. Ծնողը պետք է գիտակցի սրա կարեւորությունը եւ ընդհանրապես կապ չունի, թե որ արվեստի դպրոցը կընտրի իր երեխայի զարգացման համար»,- նշեց Աբել Աբելյանն ու շարունակեց.

 

«Մեր դպրոցում ընտրելով, օրինակ,,միայն պարը, երեխան կստանա գիտելիքներ նաեւ դերասանի վարպետության, երգեցողության, էթիկայի եւ այլ առարկաների մասին, ինչպես նաեւ կմասնակցի մանկական յոգային: Սա կօգնի, որպեսզի երեխան հետագայում ինքը որոշի, թե արվեստի, ո՞ր ճյուղն է առավել իրեն հետաքրքրում: Պետք է նշեմ մի շատ կարեւոր հանգամանք եւս՝ մեզ մոտ առաջին երկու դասերը անվճար են. նման քաղաքականությունը դիտմամբ ենք մշակել, որպեսզի, եթե երեխան այլեւս ցանկություն չունենա հաճախել, ծնողը անիմաստ գումար վատնած չլինի, իսկ առաջին երկու դասերի ընթացքում երեխան կհասկանա՝ ուզում է շարունեկել, թե՝ ոչ: Սա կօգնի նաեւ մեր դասախոսներին հասկանալու, թե երեխան, ո՞ր ճյուղին է ավելի համապատասխան»:

 

Մեզ հետ զրույցում Աբել Աբելյանը խոսեց նաեւ դպրոցի գնային քաղաքականությունից.

 

«Ուսումնասիրելով շուկան՝ պետք է փաստեմ, որ մեզ մոտ գները բավականին մատչելի են: Մենք ունենք երկու փաթեթ՝ 12.000 եւ 15.000 դրամ, դասերը շաբաթը երեք անգամ են՝ 1.5 ժամ տեւողությամբ: Մենք ունենալու ենք պրակտիկ դասեր եւս, նաեւ պարբերաբար համերգներ կկազմակերպենք, ինչը էլ ավելի հետաքրքիր կլինի երեխաների համար»,- հավելեց նա:

Զբաղված լինելով իր համար այս կարեւոր աշխատանքով՝ Աբել Աբելյանը նշեց նաեւ, որ որպես դերասան ներկայանալն իր համար այժմ այնքան էլ կարեւոր չէ, թեեւ իր լավ առաջարկից եւս չի հրաժարվի: 

 

«Դերասանի համար ինքնաարտահայտվելը շատ կարեւոր է, բայց քանի որ իմ դպրոցում նաեւ դասավանդում եմ, այդ խնդիրն ինքնաբերաբար չեմ ունենում: Ինձ համար հիմա շատ ավելի կարեւոր է դպրոցիս ու մեր ուսանողների հաջողությունը: Ես մեծ հաճույք եմ ստանում, երբ տեսնում եմ իմ ուսանողին եթերում, զանգում եմ, շնորհավորում, գուցե ուղումներ անում»,- նկատեց նա:

Միաժամանակ՝ Աբել Աբելյանը նպատակ ունի առաջիկայում անձամբ ֆիլմ նկարահանել.

«Իհարկե, ապագայի համար մտքեր ունեմ ֆիլմ նկարահանել: Բայց փորձում եմ քայլ առ քայլ առաջ շարժվել, քանի որ միաժամանկ մի քանի լայնածավալ նախագիծ իրականացնելիս՝ հաստատ մի կողմը կտուժի: Մեր դպրոցում կա ռեժիսորական, օպերատրական բաժիններ եւս, այնպես որ հետագայում մեր մասնագետների, դերասանների հետ շատ աշխատանք ունենք իրականացնելու: Առաջ Աստված՝ ես ամեն ինչ անում եմ լավ արդունք ունենալու համար»,- ավարտեց Աբել Աբելյանը: