Մոսկվայում Էրդողանը Պուտինին պատմել է իր թշնամիների մասին. Газета-ի անդրադարձը Պուտին-Էրդողան հանդիպմանը

Նախօրեին Ռուսաստանի Դաշնության նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի՝ Մոսկվայում տեղի ունեցած հանդիպման ժամանակ Էրդողանը Պուտինին պատմել է իր թշնամիների մասին, գրում է ռուսական gazeta.ru կայքը: 

Հայտնի է, որ նախագահների քննարկման հիմնական թեման եղել են տարածաշրջանային խնդիրները և գլխավորապես՝ սիրիական ճգնաժամը:

Նշվում է, որ հանդիպման ժամանակ Պուտինն ու Էրդողանը նաև քննարկել են ռուս-թուրքական հարաբերությունների կարգավորման ընթացքը։ Պուտինը հայտարարել է ՌԴ-ի և Թուրքիայի միջև արագ տեմպերով միջպետական կապերի վերականգնման, ինչպես նաև առևտրատնտեսական համագործակցության վերսկսման մասին։ ՌԴ նախագահը խոստացել է նաև աստիճանաբար չեղարկել Թուրքիայի հանդեպ սահմանված տնտեսական սահմանափակումները: 

Էրդողանն, իր հերթին, ևս մեկ անգամ ցավակցություն է հայտնել Անկարայում սպանված ՌԴ դեսպան Անդրեյ Կառլովի մահվան կապակցությամբ:

Ինչպես պատմում է քաղաքագետ, թուրքական ԶԼՄ-ների հետ կապերի մասնագետ Ալեքսանդր Կիրպիչովը, որը նույնպես ծանոթ է բանակցությունների ընթացքին, Էրդողանը Պուտինի հետ հանդիպման ժամանակ ավելի շատ կենտրոնացել է քրդական գործոնի վրա:

«Էրդողանի համար քրդական գործոնը «կարմիր լաթ» է տարածաշրջանային անվտանգության, ինչպես նաև հենց Թուրքիայի անվտանգության շրջանակներում: Թուրքիայի նախագահը Ռուսաստան էր ժամանել կոչ անելու դադարեցնել քրդերի հետ ցանկացած համագործակցություն, մանավանդ՝ «Քուրդիստանի աշխատավորական կուսակցության» (PKK) և Սիրիայի տարածքում գործող քրդական ազգային ինքնապաշտպանության ջոկատների (YPG) հետ: Էրդողանի համար կարևոր է, որպեսզի Ռուսաստանը չհամագործակցի Սիրիայում քրդերի հետ, որտեղ թուրքական ԶՈւ-ն իրականացնում է «Եփրատի վահան» ռազմական գործողությունը, որը փաստացի ուղղված է քրդերի դեմ: Անկարան վաղուց պլանավորում է բուֆերային գոտի ստեղծել Թուրքիայի և Սիրիայի քրդական շրջանների միջև», - նշել է քաղաքագետը:

Նա հավելել է, որ Էրդողանն իր անհանգստությունն է հայտնել Ռուսաստանի տարածքում քրդերի ծավալած գործունեության հետ կապված և իր խոսքում նույնականացրել է նրանց «Իսլամական պետություն» ահաբեկչական խմբավորման հետ, թեև ի տարբերություն ԻՊ-ի՝ քրդական երկու զինված խմբավորումները ՌԴ տարածքում ահաբեկչական չեն համարվում:

Հայտնի է նաև, որ Էրդողանն անդրադարձել է Թուրքիայում 2016թ.-ի հուլիսի 15-ին տեղի ունեցած ռազմական հեղաշրջման փորձի գլխավոր կազմակերպիչը համարվող թուրք կրոնական քարոզիչ Ֆեթուլլահ Գյուլենին ու նրա «Հիզմեթ» կրոնական շարժմանը:

Նա ընդգծել է, որ գյուլենականները տարբեր կազմակերպությունների անվան տակ գործունեություն են ծավալում նաև Ռուսաստանի մի շարք քաղաքներում, այդ թվում՝ Մոսկվայում և Սանկտ Պետերբուրգում: «Մենք հավատում ենք, որ ռուսական իշխանությունները քայլեր կձեռնարկեն այդ գործունեությունը դադարեցնելու համար»,- ասել է թուրք նախագահը։

Հիշեցնենք, որ 2016 թվականի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայում բնակվում է ԱՄՆ Փենսիլվանիա նահանգում: