Նոր սոցհարցում. «Ծառուկյան դաշինքը» դարձյալ առջևում է. «Փաստ»

«Փաստ» օրաթերթը գրում է.

Հայաստանի բնակչությունը դրական է գնահատում վարչապետ Կարեն Կարապետյանի գլխավորած կառավարության աշխատանքը` չնայած երկրում տիրող իրավիճակից ընդհանուր դժգոհությանը: Մարտի 9–ին լրագրողների հետ հանդիպմանն այս մասին ասաց Հասարակական կարծիքի ուսումնասիրման համառուսական կենտրոնի գլխավոր տնօրեն Վալերի Ֆյոդորովը` ներկայացնելով «Շանթ» հեռուստաընկերության պատվերով Հայաստանում իրականացրած սոցիոլոգիական հարցման արդյունքները: «Հարցվածների միայն 12%–ն է բացասական գնահատել կառավարության աշխատանքը: 31%–ը միանշանակ դրական է գնահատել Կարեն Կարապետյանի կառավարության աշխատանքը, իսկ 46%–ը` ավելի շուտ դրական»,– նշեց Ֆյոդորովը:

Նա ընդգծեց, որ Հայաստանի հասարակությունը կառավարության աշխատանքների վերաբերյալ տեղեկացվածության բարձր մակարդակ ունի: Հարցվածների միայն 6%–ն է ասել, որ կառավարության աշխատանքի մասին ոչինչ չգիտի: «Հարցվածները Կարեն Կարապետյանի գլխավորած կառավարության հաջող աշխատանքի արդյունք են համարում գնաճի նկատմամբ վերահսկողությունը, կադրային ճիշտ քաղաքականությունը, ընդհանուր իրավիճակի նկատմամբ վերահսկողությունը, հարկային քաղաքականության փոփոխությունները, կոռուպցիայի դեմ պայքարի առաջընթացը, ճանապարհային երթևեկության ոլորտի բարեփոխումները»,– հայտնեց Վալերի Ֆյոդորովը:

Նա ընդգծեց, որ հարցվածները կառավարության աշխատանքում շատ քիչ թերություններ ու սխալներ են մատնանշել, որոնք հիմնականում վերաբերում են կառավարման եղանակներին, ծախսերի կրճատմանը:

Հայաստանում Ազգային ժողովի ընտրություններին ընդառաջ բնակչությունը հիմնականում գոհ չէ երկրում տիրող իրավիճակից: Հարցման մասնակիցների 33%–ն այն կարծիքին է, որ Հայաստանում իրավիճակը գրեթե չի փոխվում, 13%–ը կարծում է, որ իրավիճակն ավելի շուտ լավանում է, 32%–ը գտնում է, որ միանշանակ վատանում է, իսկ 19%–ը` ավելի շուտ վատանում է: «Այսպիսով կարելի է եզրակացնել, որ այսօր տիրող իրավիճակի նկատմամբ բնակչության մոտ ավելի շատ բացասական տրամադրություններ են: Մարդիկ բացասական են գնահատում նաև փոփոխությունների դինամիկան»,– նշեց Վալերի Ֆյոդորովը:

Հարցվածների 20%–ի համար առաջնահերթ է իշխանության փոփոխությունը, 10%–ի համար` առաջիկա ընտրությունները, 6%–ի համար` սահմանին տիրող իրավիճակը: «Հանրապետության բնակչությունը բավականին քաղաքականացված է: Հարցվածների 71%–ն ասել է, որ մշտապես կամ ժամանակ առ ժամանակ հետևում են երկրի սոցիալ–քաղաքական վիճակին: Սա հետխորհրդային տարածքի այլ երկրների համեմատ բավականին մեծ թիվ է: Քաղաքացիները հիմնականում հետևում են երկրում քաղաքական և տնտեսական զարգացումներին»,– ընդգծեց Վալերի Ֆյոդորովը:

Հարցման մասնակիցների 45%–ը Հայաստանի առջև ծառացած լուրջ խնդիր է համարել գործազրկությունը: 22%–ը համարում է, որ լուրջ խնդիր է հանրապետությունում ճանապարհների վիճակը: Հարցվածների 14 տոկոսն էլ այն կարծիքին է, որ երկրի համար լուրջ խնդիր է շրջակա միջավայրի պահպանությունը, 13%–ը` աղքատությունը, 8%–ը` ջեռուցման և էլեկտրականության հետ կապված խնդիրները, 8%–ը` հասարակական տրանսպորտի վատ աշխատանքը, 7%–ը` կրթության ոլորտի խնդիրները, 7%–ը` թոշակների ցածր մակարդակը, 5%–ը` միգրացիայի խնդիրները:

Հարցումն անցկացվել է հանրապետության ողջ տարածքում: Հարցման մասնակիցների 36%–ը բնակվում է Երևանում, 29%–ը` երկրի այլ քաղաքներում, 36%–ը` գյուղական համայնքներում: Ընդհանուր առմամբ հարցմանը մասնակցել է 1600 մարդ:

Շարունակությունը` «Փաստ» օրաթերթի այսօրվա համարում: