Ազգային ժողովի նախագահը շնորհավորական ուղերձ է հղել մարտի 8-ի առթիվ

ՀՀ ազգային ժողովի նախագահ Գալուստ Սահակյանը շնորհավորական ուղերձ է հղել կանանց տոնի կապակցությամբ:

Ինչպես «Արմենպրես»-ին տեղեկացրին ՀՀ Ազգային ժողովի հասարակայնության և տեղեկատվության միջոցների հետ կապերի վարչությունից, ԱԺ նախագահի շնորհավորական ուղերձում ասվում է.

«Սիրելի՛ կանայք, շնորհավորում եմ ձեզ Կանանց տոնի առթիվ:

Այն ջերմությունը, որ կնոջ շնորհիվ ստեղծվում է ընտանիքում, յուրահատուկ է:
Այն երջանկությունը, որ կնոջ շնորհիվ թեւածում է ընտանիքում, անչափելի է: Համերաշխության եւ հանդուրժողականության այն մթնոլորտը, որ կնոջ շնորհիվ ձեւավորվում է ընտանիքում, անգնահատելի է:

Պետությունը մի մեծ ընտանիք է, որտեղ երջանկությունը, համերաշխությունն ու հանդուրժողականությունը նույնչափ անհրաժեշտ ու կարեւոր են: Ամուր պահելով եւ զորացնելով ընտանիքը՝ դուք ամուր եք պահում նաեւ երկիրը, երկրի սահմանները, երաշխավորում երկրի վաղվա օրը, երկրի անվտանգությունն ու առաջընթացը:

Ձեր դաստիարակած զավակներն այսօր մեր հայրենիքի հույսն ու ապավենն են, խաղաղության եւ անվտանգության հուսալի երաշխավորը: Ձեր շնորհիվ խաղաղությունը, մեր անվտանգությունը միշտ ապահով ձեռքերում են, քանզի հայրենիքի զինվորը, հայրենիքին երդվելով, երդվում է նաեւ մոր առաջ:

Համոզված եմ, որ վաղվա օրը լինելու է ավելի լուսավոր եւ ավելի ապահով, եւ դրանում, վստահաբար, շարունակելու է նշանակալից մնալ ձեր դերը, սիրելի՛ կանայք:

Եւս մեկ անգամ շնորհավորելով այս ջերմ ու գեղեցիկ տոնի առթիվ` մաղթում եմ ձեզ, սիրելի՛ կանայք, առողջություն, բարեկեցություն, սեր ու լավատեսություն»: