Եղիշե Թադևոսյանի «Կնոջ դիմանկարը» կտավի բնորդուհին նկարչի կինն է` Ժյուստին Նեֆը

Արվեստասեր հասարակության շրջանակում հայկական իմպրեսիոնիզմի առաջատար վարպետ Եղիշե Թադևոսյանի «Կնոջ դիմանկարը» (1905թ.) հանրահռչակելու նպատակով Ռուսական արվեստի թանգարանը կթողարկի հուշանվերներ, որոնք յուրաքանչյուր անձ կարող է ձեռք բերել թանգարանի տաղավարից։ Եղիշե Թադևոսյանի «Կնոջ դիմանկարը» (1905թ.) կտավը Կանանց տոների առթիվ կցուցադրվի մարտի 10-ին` Ռուսական արվեստի թանգարանում:

Ինչպես «Արմենպրես»-ին տեղեկացրեցի ՀՀ մշակույթի նախարարության հասարակայնության հետ կապերի բաժնից`ցուցահանդեսում «Կնոջ դիմանկարի գաղտնիքը» խորագրով դասախոսություն կանցկացվի:

Իր խիստ առանձնահատուկ գեղարվեստական լուծումներով նշանավորվող «Կնոջ դիմանկարը» կտավը հայկական մոդեռն-իմպրեսիոնիզմի մարգարիտներից մեկն է:

Առաջիկայում՝ մարտի 24-ին, Մոսկվայի Ռուսական իմպրեսիոնիզմի թանգարանում կայանալիք «Հայկական իմպրեսիոնիզմը: Մոսկվայից-Փարիզ» խորագրով ցուցահանդեսին ներկայացվելու նպատակով կտավը հետազոտվեց, ինչի արդյունքում բացահայտվեց բնորդուհու ինքնությունը, որը ոչ այլ ոք է, քան նկարչի կինը՝ Ժյուստին Նեֆը, որի կերպարը մինչ օրս հայտնի էր միայն Հայաստանի ազգային պատկերասրահի ցուցադրության մեջ ներկայացված՝ «Նկարչի կինը՝ Ժյուստինը» հանրահայտ կտավից:

Մինչ ռուսաստանյան արվեստասեր հասարակայնությանը ներկայացվելը, միջոցառումը հայ հանդիսատեսին հնարավորություն կտա ևս մեկ անգամ հմայվելու արվեստի այս ստեղծագործությամբ և ունկնդրելու թանգարանի ավագ գիտաշխատող, արվեստաբան Լիլիթ Սարգսյանի դասախոսությունը, որում նա համակողմանիորեն կներկայացնի իր հետազոտությունը Թադևոսյանի այս և նույն շրջանին վերաբերող մի քանի այլ կտավների մասին, կբացահայտի թադևոսյանական իմպրեսիոնիզմի հմայքը, ինչպես նաև հետաքրքրաշարժ փաստավավերագրեր: