Արիստակես Հովսեփյանի «Անքնություն» բանաստեղծությունների ժողովածուն հանձնվեց ընթերցասերների դատին

 Լույս է տեսել Արիստակես Հովսեփյանի բանաստեղծությունների անդրանիկ ժողովածուն, որում ներառված են հեղինակի կյանքի տարբեր փուլերում գրված գործեր:  Ժողովածուն կրում է «Անքնություն» վերնագիրը: Գրքի շնորհանդեսը տեղի ունեցավ մարտի 6-ին՝ «Թիմ Թայմ» ակումբում:

«Ընդգրկել եմ կյանքիս տարբեր ժամանակահատվածներում գրված գործեր: Ժողովածուում ներկայացված են խոհական մտորումներս, հայրենիքիս,  հայրենի լեռնաշխարհին, սիրածս կնոջը նվիրված բանաստեղծություններ և քառյակներ: Շատ ուրախ կլինեմ, եթե գործերս սիրվեն»,-«Արմենպրես»-ի հաղորդմամբ՝ նշեց Արիստակես Հովսեփյանը:

Գիրքը խմբագրել է  Դավիթ Գյուրջինյանը: Նրա խոսքով՝ Արիստակեսը համեստ մարդ է:

«Մենք ասում ենք նոր անուն, բայց Արիստակեսը վաղուց է ստեղծագործում: Կարողանում է  գեղեցիկ և պատկերավոր արտահայտել իր հոգում կուտակվածը:  Ուրախ եմ, որ նա վճռեց հրատարակել իր ստեղծագործությունները: Հաճույքով եմ կարդացել դրանք և խմբագրել»,- ասաց խմբագիրը և հավելեց, որ գրքում կա անձնական քնարերգություն, որը ծնվել է  հայկական դասական բանաստեղծության ակունքներից, սակայն Արիստակեսն ունի իր սեփական ձեռագիրը և կարող է երկար ճանապարհ անցնել:

Շնորհանդեսին ներկա էին հեղինակի ընկերները, հարազատները և գրական ոլորտի ներկայացուցիչներ:

Արիստակես Հովսեփյանը մասնագիտությամբ ինժեներ է և աշխատում է այդ բնագավառում: Ստեղծագործում է վաղ տարիքից: «Անքնություն» բանաստեղծությունների ժողովածուն հրատարակել է իր մտերիմ ընկերոջ՝ լուսանկարիչ Էդգար Հարությունյանի հորդորով և աջակցությամբ: