Հանրապետականը սկսել է քարոզչապաստառներ փակցնել` խախտելով օրենքը. «Փաստ»

«Փաստ» օրաթերթը գրում է.

Այո, Հայաստանի Հանրապետական կուսակցությունը ժամանակից առաջ ընկնելով կամ գուցե իր քարոզչական աշխատանքները ժամանակին չհասցնելու մտավախությունից ելնելով արդեն իսկ սկսել է նախընտրական քարոզարշավ, այն դեպքում, երբ ըստ ԿԸՀ պաշտոնական կայքում հրապարակված, ապրիլին կայանալիք խորհրդարանական ընտրությունների ժամանակացույցի նախընտրական քարոզչությունը կարող է սկսվել մարտի 5–ից ոչ շուտ: Այս դեպքում «Հանրապետականի» ձեռնարկած աշխատանքները հակասում են Ընտրական օրենսգրքին: 

Կուսակցությունն այս պահի դրությամբ քաղաքի տարբեր հատվածներում, հասցրել է փակցնել պաշտպանության նախարար Վիգեն Սարգսյանի, արդարադատության նախարար Արփինե Հովհաննիսյանի և վարչապետ Կարեն Կարապետյանի պաստառները՝ «Անվտանգություն և առաջընթաց» կարգախոսով: Ի դեպ, Կարապետյանի պաստառը արդեն երկրորդ օրն է, որ փակցված է Սախարովի հրապարակում՝ Սպորտի և երիտասարդության հարցերի նախարարության, Վլադիմիր Ենգիբարյանի անվան ՀՀ բռնցքամարտի օլիմպիական մարզադպրոցի դիմային հատվածում: 
Դե իսկ նախարարներ Վիգեն Սարգսյանի (ՀՀԿ ցուցակի 1–ին համար) և Արփինե Հովհաննիսյանի (2–րդ համար) պաստառներն էլ երեկ են փակցվել Արշակունյաց 2 հասցեում գտնվող շենքի պատին: 

Երեք դեպքերում էլ պաստառները փակցված են ամենատեսանելի հատվածներում և բավական մեծ մակերես ունեն, այնպես որ չնկատել հնարավոր չէ: 
Ինչի՞ համար է նման շտապողականությունը: Օրենսգրքի դրույթներին հակասելը սովորական երևույթ է ՀՀԿ–ի համար:

 

Շարունակությունը` «Փաստ» օրաթերթի այսօրվա համարում: