Խանությում հետևիցս գոռաց` «տականք, դու ստեղ ի՞նչ գործ ունես». Հակոբ Հակոբյան

Հաղորդավար Հակոբ Հակոբյանին հեռուստադիտողն արդեն երկար ժամանակ է, ինչ չի տեսնում էկրաններին: Թե ինչո՞վ է պայմանավորված նրա էկրանային լռությունն ու ի՞նչ աշխատանքներով է այժմ տարված, Հակոբը պատմել է Life.panorama.am-ին:

 

«Նախ պետք է ասեմ, որ հակառակ շատերի կարծիքներին, «ATV»-ի և առհասարակ «ՊանԱրմենիան Մեդիա Գրուպի» հետ հարաբերություններս հրաշալի են, մեր մեջ ոչ մի լարվածություն չկա և հույս ունեմ, որ շուտով մենք կրկին կհամագործակցենք միասին: Ինքս հակված եմ նոր հաղորդման շրջանակներում ներկայանալ, քանի որ հատկապես երկու փորձից հետո հասկացա, որ, ճիշտ է, դերասանական արվեստը ևս հետաքրքիր է, սակայն ինձ ավելի լիարժեք եմ տեսնում հաղորդավարի կարգավիճակում»,- նշեց Հակոբը:

 

Անդրադառնալով որպես դերասան ներկայանալուն և հանրության կողմից ընդունվելուն, Հակոբը նկատեց, որ անկախ իր վերաբերմունքից` հանրության արձագանքը ապշեցնող է եղել իր համար.

 

«Թեև ինձ դերասանի կարգավիճակում այնքան էլ չեմ տեսնում, բայց նոր ու լավ առաջարկից չեմ հրաժարվի, քանի որ, կարծում եմ,  առաջին փորձերս վատ չէր: Այս կարծիքին եմ եկել հեռուստադիտողի արձագանքից: «Քարե դարդ»-ում չնայած Մամուկի հերոսի քիչ խաղին, նա սիրվեց ու դեռևս չի մոռացվում, ավելին` նա մինչ այսօր ինձ հետապնդում է: Իսկ «Աբելի քույրը» հեռուստասերիալում, որտեղ բացասական հերոսի էի մարմնավորում, փաստորեն կարողացա այնպես ներկայացնել հերոսիս, որ նրան սկսեն ատել: Ես երբեք չեմ մոռանա, թե ինչպես մի անգամ խանութում մի կին հետևիցս գոռաց` «Տականք, դու ստեղ ի՞նչ գործ ունես», հետո սթափվեց, ու ասաց` «Ներիր Հակոբ ջան, մի պահ մոռացել էի, որ դու ընդամենը դերասան ես ու այդ տղայի հետ կապ չունես»: Ինձ փողոցում տեսնելիս, մարդիկ մտածում էին, թե վտանգավոր եմ իրենց համար, այս ամբողջ վերաբերմունքը եկավ իմ հերոսից, իսկ սա նշանակում է, որ ես կարողացել եմ այնպես խաղալ, որ մարդիկ հավատան նրան»,- պատմեց Հակոբը:

 

Ինչպես շատերը գիտեն` նախորդ տարի ապրիլյան քառօրյա պատերազմից հետո, Հակոբ Հակբոյանն ու երգիչ Արմեն Հովհաննիսյանը համատեղ փոքրիկ նախագիծ սկսեցին: Հակոբի խոսքով, այն ժամանակ չէին էլ պատկերացնում, որ մեքենայում երգելն ու այն տեսագրելը այդքան մեծ արձագանքն կունենա, բայց հանրության վերաբերմունքից ու հետաքրքրվածությունից ելնելով` Հակոբն ու Արմենը ձայնագրեցին հաջորդ երգը, ապա մյուս և այդպես շարունակ: Արդեն նաև երգիչ Հակոբ Հակոբյանը առաջինը Life.panorama.am-ին պատմեց, որ ինքն ու Արմենն արդեն ունեն իրենց պրոդյուսերն ու տնօրենը և գարնանը կներկայացնեն իրենց առաջին տեսահոլովակը.

«Միշտ էլ իմ թաքուն երազանքներից է եղել երգելն, ու հիմա ինձ տրվել է այդ հնարավորությունը: Մենք արդեն ունենք պրոդյուսեր, ով հայտնի է հանրության շրջանում, սակայն նրա անունը դեռևս չենք ուզում նշել: Ունենք նաև տնօրեն, ով զբաղվում է մեր զույգի աշխատանքներով: Մենք արդեն ունենք հատուկ մեզ համար գրված երեք երգ, որոնք հաջորդաբար կներկայացնենք: Գարնանը սպասվում է տեսահոլովակ, որը, հուսամ, նույն վերաբերմունքին կարժանանա, ինչ այն տեսանյութերը, որոնք արվում էին մեքենայում»,- նշեց Հակոբը, իսկ նկատառամանը, թե վախ չկա՞, որ մարդիկ սիրում էին տեսնել այս զույգին հենց այն փոքրիկ հոլովակներով, որոնք արվում էին մեքենայում և գուցե տեսահոլովակը հակառակ ազդեցությունն առաջացնի, պատասխանեց.

 

«Այս հարցի շուրջ իրականում երկար ենք մտածել ու մինչ օրս անհանգստանում ենք: Միաժամանակ, թե մեզ, թե հանդիսատեսին նորություն է պետք: Մենք կփորձենք ներկայացնել մեր համատեղ տեսահոլովակն ու մեծ բծախնդրությամբ կհետևենք հանրության կարծիքին: Մի բան հաստատ է, ի ուրախություն մեզ, մեր զույգը բավականին սիրվել է, այսօր մենք հայտնի երգիչների հետ կորպորատիվ երեկոյի ենք մասնակցում ու շատ ակնհայտ տեսանելի է, թե մարդիկ ինչ արձագանք ենք տալիս, երբ մենք ենք բեմ բարձրանում: Չեք էլ պատկերացնի, թե դա ինչ ոգևորիչ է, երբ անծանոթ մարդիկ կարող են մոտենալ ու իրենց գովերգի խոսքն ասել: Այս ամենից հետո նոր աշխատանքով ներկայանալու մասին չմտածելն ուղղակի անհնար է: Շեշտեմ, եթե Արմենը արդեն հայտնի երգիչ էր, ապա ես երգելու մտադրություն չեմ ունեցել. սիրել եմ երգը, բայց դրանով լուրջ զբաղվելու պատկերացումներ չունեի, իսկ արձագանքներից հետո հասկացա, որ ժողովուրդն է մեր փոխարեն որոշել, որ ես ու Արմենը պետք է իրար հետ երգենք»: