Խորեն Լևոնյանը «Երգ երգոց»–ի 7-ամյակի մասին

Tert.am Life–ը գրում է

7 տարի է՝ «Երգ երգոց» նախագիծը յուրաքանչյուր կիրակի Առաջին ալիքի եթերից հանդիսատեսին է ներկայացնում սիրված հայկական երգերը: Նախագծում հնչում են Հայաստանի պատմության տարբեր ժամանակահատվածները ներկայացնող երգեր, որոնք ուղեկցվում են տվյալ պատմափուլի ժամանակագրությունը ներկայացնող տեսանյութով: 

 ««Երգ երգոցը» հնարավորություն է տալիս միջին և մեծ սերնդի ներկայացուցիչներին վերհիշելու այն երգերը, որոնք եղել են ժամանակին, որոնք իրենք լսել են, իսկ երիտասարդ սերնդի համար լավ է, երբ հնարավորություն ունես ինֆորմացիա ստանալու»,– Tert.am Life–ի հետ զրուցում ասաց նախագծի հաղորդավար Խորեն Լևոնյանը։

 Հաղորդման հաջողության գրավականներից մեկը Խորեն Լևոնյանը թիմային ջերմ հարաբերություններն է համարում։ «Հաղորդումը աշխարհի տարբեր մասերում հային պահում է հայ՝ թե՛ խոսքով, թե՛ երաժշտությամբ»,– նշեց նա։

 Երաժշտական նախագիծը հյուրախաղերով հանդես է եկել Բեյրութում Ստեփանակերտում, ԱՄՆ-ում: 7 տարիների ընթացքում եթեր է հեռարձակվել շուրջ 500 հաղորդում:

 «Հաճախ եմ սփյուռքում լինում, որտեղ միշտ բերկրանքով, կարոտով ու սիրով են խոսում «Երգ երգոց»–ի մասին։ Կարծում եմ՝ այնպիսի հաղորդում չկա, որ բոլորը սիրեն դա, բայց վստահ եմ՝ սա այն հաղորդումն է, որը եթե ոչ բոլորը, ապա շատ մարդիկ սիրում են։ Գիտեմ մարդկանց, որոնք ապրում են այս հաղորդումով»,– նախագծի մասին ասաց Ալլա Լևոնյանը։