Պաշտոնյան մեկնել է Բելառուս. «Փաստ»

«Փաստ» օրաթերթը գրում է.

Վարչապետ Կարեն Կարապետյանի որոշումներից տեղեկանում ենք, որ վարչապետը ֆինանսների նախարարության աշխատակազմի եկամուտների քաղաքականության և վարչարարության մեթոդաբանության վարչության վարչարարության մեթոդաբանության բաժնի պետ Արթուր Ալեքսանյանին փետրվարի 8–10–ը գործուղել է Բելառուսի Հանրապետություն (Մինսկ)՝ Եվրասիական տնտեսական հանձնաժողովի կոլեգիային կից հարկային քաղաքականության և վարչարարության խորհրդատվական կոմիտեի փորձագետների խորհրդակցությանը մասնակցելու համար:

Նշենք, որ Բելառուսը Իսրայելի ու ՌԴ–ի քաղաքացի, բլոգեր Ալեքսանդր Լապշինին արտահանձնեց փետրվարի 7–ին, որից հետո վարչապետ Կարեն Կարապետյանը չեղյալ ճանաչեց ՀՀ ոստիկանապետի տեղակալ Վարդան Եղիազարյանին մարտի 2–5–ը՝ Բելառուսի Հանրապետություն գործուղելու մասին նախկինում ընդունված որոշումը: Եղիազարյանը Մինսկ պիտի մեկներ մասնակցելու Բելառուսի ոստիկանության 100–ամյակին նվիրված տոնակատարություններին:

Երեկ «Փաստը» ֆինանսների նախարարության լրատվական բաժնից փորձեց ճշտել, թե արդյոք Ալեքսանյանն իրոք մեկնե՞լ է Բելառուս: «Այո, մեկնել է, բայց դա եղել է փետրվարի 7–ին, մինչ Լապշինի հետ կապված դեպքը: Ալեքսանյանը Եվրասիական տնտեսական հանձնաժողովի աշխատանքային խմբի ներկայացուցիչ է և տարին 2 անգամ մասնակցում է նիստերին»,– եղավ ֆիննախի պատասխանը:

 

Շարունակությունը` «Փաստ» օրաթերթի այսօրվա համարում: