Բարսելոնան 6 անպատասխան գնդակ ուղարկեց Ալավեսի դարպասը

Իսպանիայի առաջնության 22-րդ տուրում «Բարսելոնան» հյուրընկալվելիս 6:0 հաշվով հաղթեց «Ալավեսին»:

 37-րդ րոպեին Սուարեսը բացել է խաղի հաշիվը, իսկ 3 րոպե անց այն կրկնապատկել է Նեյմարը՝ օգտվելով «Ալավեսի» դարպասապահի սխալից:

 59-րդ րոպեից մինչև 67-րդ րոպեն «կապտանռնագունները» 4 գոլ խփեցին. 59-րդ րոպեին Մեսսին 3-րդ գնդակն է ուղարկել տանտերերի դարպասը: 4 րոպե անց Մեսսիի առաջխաղացումից հետո «Ալավեսի» ֆուտբոլիստ Ալեքսիսից գնդակն անդրադարձավ՝ հայտնվելով դարպասում:

 65-րդ րոպեին Իվան Ռակիտիչը հուժկու հարվածով գնդակն ուղարկեց դարպասը, իսկ 2 րոպե անց Լուիս Սուարեսը դուբլ ձևակերպեց:

 «Բարսելոնան» 10 ֆուտբոլիստներով ավարտեց հանդիպումը. 85-րդ րոպեին ցավալի վնասվածք ստացավ Ալեիշ Վիդալը և պատգարակով դուրս բերվեց խաղադաշտից:

 Այս հաղթանակից հետո Լուիս Էնրիկեի գլխավորած թիմը վաստակում է 48 միավոր և 2 միավոր առաջ է «Ռեալից», որը 3 հանդիպում պակաս է անցկացրել: