Ոստիկանները կրկին ուժով հեռացրել են բողոքող սեւազգեստ մայրերին նախագահական նստավայրի մայթից

«Ոստիկանների գլխավորը հրամայեց շղթա կապել, կլոր օղակով շղթա կապեցին ու հրելով, քաշքշելով մեզ տարան մյուս մայթ, չնայած շատ ուժ չէին գործադրում, բայց ձեռքերի շղթայից պարզ էր, որ իրենք իրենց գործողությունները ներքեւից անում են...»

Բանակում խաղաղ պայմաններում զոհված ժամկետային զինծառայողների մայրերին  այսօր` հունիսի 11-ին ոստիկանները կրկին թույլ չեն տվել բողոքի ակցիա անցկացնել նախագահական նստավայրի դիմաց։ Մահացած զինծառայող Արթուր Ղազարյանի մայրը՝ Իրինա Ղազարյանը NEWS.am-ի հետ զրույցում ասաց, որ մոտ 20 ոստիկան բռնի ուժով իրենց տեղափոխել են դիմացի մայթ:

«Առավոտյան 10։38–ին գնացի, կանգնեցի Բաղրամյան 26–ի մոտ։ Երկու ոստիկան էր կանգնած, հենց ինձ տեսան, երկուսը դարձան ուղիղ 20 հոգի։ Դեռ մյուս մայրերը չկային, երբ ոստիկանները եկան, լցվեցին։ Մինչեւ 11–ը բոլոր մայրերը եկան, ուզեցինք գնալ նախագահական մոտ, ոստիկաններն արդեն հսկա պատ էին կազմել ու չէի թողում մոտենալ։ Ոստիկանների գլխավորը հրամայեց շղթա կապել, կլոր օղակով շղթա կապեցին ու հրելով, քաշքշելով մեզ տարան մյուս մայթ։ Չնայած շատ ուժ չէին գործադրում, բայց ձեռքերի շղթայից պարզ էր, որ իրենք իրենց գործողությունները ներքեւից անում են»,– պատմեց Իրինա Ղազարյանը։

Մահացած Արթուր Ղազարյանի մայրը նշեց, որ իրենց հեռախոսազանգով Բաղրամյան 26 էր եկել ՄԻՊ երեւանյան գրասենյակի ներկայացուցիչը, որը բանակցել է ոստիկանների հետ, սակայն ոչ մայրերի ներկայությամբ, ինչը, նրա խոսքով, զայրացրել է իրենց։

«Զանգեցինք Մարդու իրավունքների պաշտպանին, էլի եկավ, մեզ հարցնում է, հիմա դուք գնու՞մ եք, թե՞ բողոքի ակցիա եք անելու, ասացի` հենց բողոքի ակցիա եմ անելու, որովհետեւ իմ երեխուն սպանել են, էդ 5 երեխուն սպանել են, ծնողն իրավունք չունի՞ գնա, բողոք անի, բոլորի համար մուտքը բաց է, մեզ համար` չէ»,– ասաց նա։

Իրինա Ղազարյանի խոսքով` իրենք գնացել են նաեւ ՄԻՊ գրասենյակ, որտեղ իրենց տեղեկացրել են, որ գոյություն չունի նման օրենք, որը կարգելի նրանց «կանգնել» Բաղրամյան 26–ի առջեւ։

«Բա եթե նման օրենք չկա ինչու ոստիկանները թույլ չեն տալիս կանգնել նախագահականի դիմաց։ Ոստիկանները հո իրենք իրենցով էդ բրթելն ու էդ շղթան կապելը չարեցին, ուրեմն իրենք վերեւից ինչ–որ հրաման են ստանում»,– նշեց տիկին Իրինան։ 

Իրինա Ղազարյանը տեղեկացրեց, որ մայիսի 13-ին ոստիկանների կողմից բռնության ենթարկվելու միջադեպով ՀՔԾ-ում հարուցված քրեական գործի շրջանակում 5 մայրերի նկատմամբ նշանակված դատաբժշկական փարձաքննության արդյունքները դեռեւս հայտնի չեն, բացի դա իրենց հարցաքննության չեն կանչել։ ՄԻՊ գրասենյակում մայրերին խոստացել են հարցում անել եւ պարզել, թե ինչու են ձգձգվում փորձաքննության արդյունքները եւ հարցաքննությունը։

Հիշեցնենք, որ զոհված զինծառայողների մայրերը մայիսի 13-ին Բաղրամյան 26-ում` նախագահի նստավայրի մոտ՝  իրենց հերթական բողոքի ակցիան են անցկացրել, որի ժամանակ ոստիկանները նրանց բռնի ուժով տեղափոխել էին դիմացի մայթ՝ պատճառաբանելով, որ այդտեղ բողոքի ակցիա անցկացնել չի թույլատրվում։

Զոհված զինծառայողների ծնողները ոստիկանությունում բողոք են ներկացրել դեպքի վերաբերյալ։ Նշանակվել է ծառայողական քննություն։