Թթուջուր գյուղում գյուղատնտեսական տարին բարձր ցուցանիշներով են փակում

Գեղարքունիքի մարզի սահմանամերձ Թթուջուր գյուղում գյուղատնտեսական տարին տնտեսությունները փակում են գոհացուցիչ արդյունքներով: Ինչպես  տեղեկացրեց  Թթուջուրի գյուղապետ Վիգեն Սահակյանը, գյուղում ամբողջությամբ ավարտվել է խոտի բերքահավաքը:

«Գյուղի խոտհարքերը հնձվել են ամբողջությամբ, կուտակվել է ավելի քան 3 հազար տոննա անասնակեր, որը լիովին բավարար է անասունների ձմեռացման համար, որոշ մասն էլ մարդիկ նույնիսկ վաճառում են»,-հավաստեց համայնքի ղեկավարը: Ավարտվել է նաեւ հացահատիկի բերքահավաքը: 40 հեկտար հացահատիկի ցանքերից հավաքվել է մոտ 80 տոննա հացահատիկ:Սկսվել է նաեւ կարտոֆիլի եւ պտղի բերքահավաքը, որը կավարտվի մեկ-երկու շաբաթվա ընթացքում:Բերքահավաքին զուգահեռ` մեկնարկում է նաեւ աշնանացանը:

«Թթուջուրի 450 հեկտար վարելահողերը տարիների ընթացքում վերածվել էին խոտհարքերի: Միայն այն բանից հետո, երբ ՀՀ կառավարության կողմից իրականացվող «Համայնքների գյուղատնտեսական ռեսուրսների կառավարման եւ մրցունակության» ծրագրի շրջանակներում մեր գյուղում ստեղծված գյուղատնտեսական կոոպերատիվը ստացավ «Բելառուս» մակնիշի երկու տրակտոր եւ մեխանիզմներ, այս տարում հնարավորություն ունեցանք մշակել առաջին հեկտարները:Եկող տարում արդեն կունենանք 60 հեկտար հացահատիկային մշակաբույսերի ցանք ու աստիճանաբար վարելահողերի մեծ մասը կդարձնենք մշակովի:Կարեւորն այն է, որ մարդիկ աստիճանաբար տեսնում են երկարգործության ու անասնապահության եկամտաբերությունը, այն դարձնում մշտական զբաղմունք: Ամեն դեպքում, գոհ ենք այս գյուղատնտեսական  տարվանից»-նշեց Վիգեն Սահակյանը: