Զարուհի Փոստանջյանը միջազգային կառույցներից հստակ գնահատական է ակնկալում Ադրբեջանի գործողությունների առնչությամբ

 Ազգային ժողովի «Ժառանգություն» խմբակցության ղեկավար Զարուհի Փոստանջյանը մտահոգված է, որ միջազգային կառույցները հավասարության նշան են դնում Հայաստանի և Ադրբեջանի միջև, երբ ակնհայտ է, որ հենց Ադրբեջանն է խախտում հրադադարի ռեժիմը և ոտնձգություն իրականացնում Հայաստանի տարածքային ամբողջականության նկատմամբ: Ազգային ժողովում խորհրդարանական ճեպազրույցների ընթացքում Զարուհի Փոստանջյանը, անդրադառնալով սեպտեմբերի 24-ի գիշերը հակառակորդի կողմից հայկական գյուղերի գնդակոծությանը, նշեց, որ ողջ պատասխանատվությունն ընկնում է ադրբեջանական կողմի վրա, քանի որ նրանք են կրակում, իսկ հայկական կողմը պաշտպանվող կողմն է:

«Այս դեպքում պարզ է, որ հավասարության նշան չպետք է լինի և հարկավոր է հստակ գնահատական տալ Ադրբեջանի գործողություններին: Այս առումով շատ անելիքներ ունենք. յուրաքանչյուր պաշտոնյա, նաև սփյուռքի մեր կազմակերպությունները պետք է ամեն ինչ անեն միջազգային հանրությանը ցույց տալու համար, որ Ադրբեջանը կրակում է հայկական գյուղերի վրա, սպանում է խաղաղ բնակիչների»,-  նշեց Փոստանջյանը:

Պատգամավորը ցավ հայտնեց, որ Ադրբեջանը շարունակում է հրադադարի ռեժիմի պարբերական խախտումները: Նրա խոսքով՝ հարկավոր է համապատասխան միջոցներ ձեռնարկել Ադրբեջանի ակտիվություն զսպելու է անցանկալի հետևանքներից խուսափելու համար:

Սեպտեմբերի 24-ին hակառակորդի կրակոցներից Տավուշի մարզի Բերդավան համայնքում զոհվել է 2 քաղաքացիական անձ, 2-ը` վիրավորվել: Զոված քաղաքացիներն են`1974 թվականին ծնված Սոնա Ռևազյանը և 1921-ին ծնված Շուշան Ասատրյանը: Ավելի վաղ հայտնի էր դարձել, որ Տավուշի մեկ այլ սահմանամերձ`Պառավաքար համայնքում հակառակորդի կրակոցից զոհվել է 83-ամյա Պայծառ Աղաջանյանը: