Ում համար են հագնվում կանայք. ֆեյսբուքյան քննարկում (ֆոտո)

Wnews.am-ը գրում է.

Ոմ համար են հագնվում կանայք: Wnews.am-ը որոշեց այս հարցն ուղղել տարբեր ոլորտներում աշխատող հայուհիներին և գտնել հարցի պատասխանը: Ինչպես նաև, ուսումնասիրել ենք հոգեբանների, դիզայներների և կանանց ֆորումներում հնչած ամենատարածված պատասխանները:

Ահա թե ինչ է ստացվել.

Արմինե Խախամյան. Անձամբ ես առաջին հերթին հագնվում եմ ինձ լավ տրամադրություն հաղորդելու համար, իսկ մյուսները, ըստ իս,  հասարակության ուշադրության։

Նառա Շահբազյան. Անշուշտ, կանանց գեղեցկանալու ջանքերը հակառակ սեռին դուր գալու ու նրանց աչքը շոյելու համար է: Բայց ինչ վերաբերում է ինձ, ես հագնվում եմ առաջինը ինքս իմ աչքը շոյելու ու ինձ դուր գալու համար, հետո նոր՝ տղամարդկանց ու հասարակության:

Մանե Հարությունյան. Տարբեր կարծիքներ ու կարծրատիպեր կան այս հարցի շուրջ: Կարծում եմ սա էլ հակասական ու հարաբերական հարց է, քանի որ իր մեջ սուբյեկտիվություն է պարունակում: Ես, օրինակ, առաջին հերթին հագնվում եմ ինձ համար, բայց չեմ ժխտում նաև այն փաստը, որ կարծիքներն ինձ համար ևս կարևոր են: Շատ է նաև այն միտքը, թե կանայք հագնվում են կանանց համար, որ նրանց ոգևորում է մրցակցության ոգին: Դա ճիշտ է, բայց եթե աշխարհում այլևս չմնային տղամարդիկ, նրանք կդադարեին հագնվել:

Հասմիկ Հովհաննիսյան. Ես հագնվում եմ ինձ համար: Ես գնում եմ այն, ինչ ինձ է դուր գալիս, անկախ նրանից դա համարվում է ՛մոդայիկ՛ թե ոչ այնքան: Ինչ-որ իրադարձության համար հագուստ ընտրելիս, կարևորում եմ որ ինքնավստահ և լավ զգամ այդ հագուստով: Այդ պատճառով էլ վստահ եմ, որ ինձ համար եմ հագնվում:

Արմինե Գեւորգյան. Ես հագնվում առաջին հերթին ինձ համար, ու կարևոր չէ այն բրենդ է, թե ոչ կարևորը՝ ես ինձ ինքնավստահ զգամ այդ հագուստի մեջ։

Լիլիթ Բաղդասարյան. Կարծում եմ՝ կանայք նախեւառաջ հագնվում են իրենք իրենց համար։ Եթե ինքդ քեզ դուր չգաս, էլ ինչպե՞ս պետք է դուր գաս մյուսներին։ Բայցևայնպես ամենակարևորը կնոջ համար կարծում եմ ճաշակի զգացողությունը, ներքին ներդաշնակությունն ու հոգու հանգստություն ն է, որոնք էլ օգնում են ավելի գեղեցիկ ու ինքնավստահ տեսք հաղորդել:

Բուրաս Պապիկյան. Իհարկե առաջին հերթին ինքս ինձ համար .. այսինքն յուրաքանչյուր իգական սեռի ներկայացուցիչ ձգտում է լինել գեղեցիկ և աչքի ընկնել .. երբ կինը գեղեցիկ է, հագնված և խնամված է, նա ավելի ինքնավստահ է .. այսինքն նա չի կարող միայն ինքն իր համար հագնվել … ես հագնվում եմ իմ շրջապատում գեղեցիկ երևալու համար .. ու թող չլինի մեկը, որ ասի իրեն շրջապատի կարծիքը չի հետաքրքրում.. այլապես ոչինչ չէր հագնի … հագնվում եմ ինքս ինձ և ինձ շրջապատողներին դուր գալու համար ։ Դեռ այն օրերից, երբ մարդը սկսեց տկլոր չլինել այլ ամաչել իր սեփական մարմնից ու սկսել հագնվել, հագուստը դարձավ նրա կյանքի բաղադրիչ մասերից մեկը… հագուստով են տարբերել աղքատներին ու հարուստներին ։ Դեռ այդ օրերից սկսած բոլորն էլ հագնվել են հասարակությանը գեղեցիկ երևալու համար … ամեն ոք ունեցել է իր համազգեստը ՝ թե’ արքա, թե’ ստրուկ ….

Անուշ Ասլիբեկյան-Արծրունի. Թե հագնվելը, թե վարսահարդարվելն ու դիմահարդարումն անում եմ միմիայն ինքս ինձ դուր գալու համար։ Այն, թե ինչպես կվերաբերվեն քեզ հասարակության մեջ, կախված է նրանից, թե ինչպես ինքդ քեզ կներկայացնես: Եթե կինն ուզում է իր արտաքինի հանդեպ ադեկվատ վերաբերմունքի արժանանալ, ուրեմն այդպես էլ պետք է ներկայանա հասարակությանը, որպեսզի հակասություն չառաջանա մարդկանց վերաբերմունքի և սեփական ներաշխարհիդ միջև: Դրանից կախված է միմիայն քո լավ զգացողությունը: Ուղիղ կապ կա կնոջ բնավորության, հաճախ՝ տրամադրության, նրա հագուկապի և հետևաբար՝ ներքին կոնֆորտի միջև: Իսկ եթե ես ինձ ինքնավստահ եմ զգում, ուրեմն գրավիչ եմ: Սակայն չեմ կարող հերքել նաև, որ մեծ կարևորություն ունի այդ ներքին ինքնավստահունթյանս հարցում ամուսնուս կարծիքն ու ճաշակը:

Նունե Այլանջյան. Հագնվում եմ ինձ համար, որովհետև սիրում եմ հայելու մեջ նայել ու տեսնել ոճային մարդու: Անտարբեր չեմ թրենդների ու նորաձևության հանդեպ: Անհեթեթ եմ համարում այն միտքը, որ կանայք հագնվում են տղամարդկանց գրավելու կամ այլ կանանց ՙՙպայթեցնելու՚՚ համար: Իհարկե, երբեմն նման հնարքների բոլորն էլ դիմում են, բայց ես՝ հազվադեպ: Այլ հարց է կրել որևէ զգեստ կամ աքսեսուար մտադրված՝ իմանալով, որ դա քո սիրելի տղամարդուն դուր է գալիս, բայց հագնվել այլ տղամարդկանց համար, նման բան չկա:

Լիանա Բարսեղյան. Իհարկե ինձ համար։ Կարեւորը՝ հագուստս հարմարավետ եւ գեղեցիկ լինի։

Մարիաննա Քաբաբյան. Կանայք հագնվում են այլ կանանց համար։ Իրականում կանայք ավելի մրցակցության մեջ են, քան ցանկանում են հակառակ սեռին դուր գալ։

Ռուբինա Գրիգորյան. Կինն առաջին հերթին հագնվում է իր համար, որպեսզի դուր գա իրեն և ինքնավստահ զգա: Շատ կարևոր է հագուստի և ներաշխարհի ներդաշնակությունը, ինչն էլ հաստատ անտարբեր չի թողնում շրջապատին, իսկ եթե կինն իր յուրահատուկ ոճով կարողանում է օրինակ դառնալ, դա արդեն հաղթանակ է:

Սաթի Մարգարյան. Իմ կարծիքով ցանկացած կին առաջին հերթին հագնվում է ինքն իր համար, ավելի ինքնավստահ զգալու համար: Շատ կանանց, աղջիկների համար ինքնաարտահայտվելու ու տարբերվելու միջոց է, որոշների համար՝ իսկական արվեստ: Երկրորդականն արդեն այլ կանանց վրա տպավորություն գործելն է: Կարծում եմ, որ նորաձևությանը հետևող ու ճաշակով իգական սեռի ներկայացուցիչներից ստացված կոմպլիմենտները հագուկապի մասին ավելի արժեքավոր են:

Արմինե Բրոսյան. Կարծում եմ, որ յուրաքանչյուրը՝ կին, թե տղամարդ, առաջին հերթին հագնվում է իր համար, որպեսզի նայի հայելու մեջ և իրեն գեղեցիկ զգա, բավականություն ստանա իր տեսքից և ինքնավստահ, դրական տրամադրված դուրս գա տանից: Տեսքի և տրամադրության կապն ավելի ակնհայտ է հենց կանանց մոտ: Հագնելով որևէ հագուստ՝ կանայք «ապահովում» են իրենց և շրջապատի տրամադությունը: Հագուստի միջոցով կանայք ցանկանում են տարբերվել մյուս կանանցից, լինել համեմատական կարգով ավելի գեղեցիկ կամ նորաոճ և հաճոյանալ տղամարդկանց՝ ստանալով հաճոյախուսություններ:

Էլեն Մուրադյան.Կարծում եմ կանայք նախ և առաջ իրենք իրենց համար են հագնվում, հետո`շրջապատի: Բայց դա միանշանակ չէ, դրա համար կանանց մի քանի տեսակ կառանձնացնեմ. ովքեր պարզապես հագնվում են մերկ չլինելու համար, ովքեր շրջապատին զարմացնելու համար են հագնվում, և նրանք, ովքեր հագուստի միջոցով փորձում են հակառակ սեռին դուր գալ: Ամեն դեպքում, ճիշտ հագնվելը կնոջ գրավչության մի մասն է: Ում կամ ինչի համար էլ կինը հագնվի, հագուստը կբնորոշի նրա խառնվածքն ու ճաշակը:

Եվ, վերջում, ամփոփելու համար, այս հարցն ուղղեցինք Wnews.am-ի նորաձևության խմբագիր Գայանե Շահինյանին: 

Ընդհանրապես, ում համար է հագնվում կինը հարցի պատասխանը կախված է նրանից, թե ում ես այդ հարցը ուղղում ՝ ինչ  նպատակ, աշխարհայացք, մասնագիտություն ու զբաղվածություն ունեցող կնոջ:  Օրինակ կինն,  ում  նպատակը տղամարդկանց դուր գալն է, եթե անգամ ինքն իրեն դա չի խոստովանում,  հագնվում է հնարավորինս սեքսուալ, գրավիչ նա միշտ ընտրում է ամենաբարձր կրունկներն ու ամենակարճ փեշը: Այսպիսի կինը կարող է ուշադրություն չդարձնել նորաձևությանը , որովհետև տղամարդիկ էլ, մեծ հաշվով, դրան նշանակություն չեն տալիս: Կինն, ով   կարևորում է ընկերուհիների կարծիքը, նրանց հաճոյախոսությանն արժանանալը կամ նրանց մոտ  նախանձ առաջացնելը, հագնվում է կանանց համար: Սա էլ հասարակության կարծիքից կախվածություն ունենալու մի տարբերակ է: Որքան կարևորում եք այլ մարդկանց կարծիքը ձեր արտաքինի, հագուստի վերաբերյալ, այդքան կախված եք այդ կարծիքից: Տարբեր ֆորումներում ամենաշատ հանդիպող պատասխանը  “հագնվում եմ ինքս ինձ համարն” է, որի հետ , սակայն հոգեբանները էլի համաձայն չեն, քանի որ “ինքս ինձ համար” հագուստը ենթադրում է ջինսեր ու կեդեր, այսինքն՝ հարմարավետություն , բայց այսպիսի պատասխան տվող կանանց 50 տոկոսը ամեն ինչ անում է շքեղ , գեղեցիկ տեսք ունենալու համար: Կանայք, ովքեր նշում են, որ  ցանկանում են դուր գալ  իրենք  իրենց, հաճույք ստանալ իրենցից և չեն կարևորում որևէ այլ կարծիք, ամեն դեպքում, գտնվում են նորաձևության,  կանանց մասին ամսագրերի, տարբեր ԶԼՄ-ների  ազդեցության տակ ՝ հետևում են թրենդներին, փորձում են նիհարել:  Եթե հոգեբաններին մի կողմ թողնենք, ովքեր , փաստորեն, համաձայն չեն ոչ մի պատասխանի հետ, ապա դիզայներները խորհուրդ են տալիս հագնվել ըստ տեղի, ըստ նպատակի և այն տպավության , որը ցանկանում եք թողնել: Բայց, ամենահրաշալի պատասխանը, որ կարդացել եմ այս հարցի շուրջ  100 տարեկանում էլ  նորաձևության իկոնա համարվող Այրիս Ափֆելինն էր. ” Կարծում եմ, որ ավելի լավ է լինել երջանիկ, քան լավ հագնված: Այնպես որ ես հագնվում եմ երջանիկ լինելու համար : Ձեզ իմ պատասխանը գոհացնո՞ւմ է”: