Հայաստանում ԱՄԷ դեսպանատան ջանքերով` Մուրացանի մանկական վիրաբուժության բաժանմունքը հագեցվել է սարքավորումներով

Մուրացանի հիվանդանոցի մանկական վիրաբուժության բաժանմունքը հագեցվել է անհրաժեշտ սարքավորումներով: Շարժայի բարեգործական հիմնադրամի ֆինանսավորմամբ` նախագիծն իրականացվել է ՀՀ-ում Արաբական Միացյալ Էմիրությունների դեսպանատան միջնորդությամբ:

«Արմենպրես»-ի հետ զրույցում Մուրացան հիվանդանոցային համալիրի մանկական վիրաբուժության բաժանմունքի վիրաբույժ Արսեն Ասլանյանը նշեց, որ բաժանմունքի որոշ սարքեր չէին աշխատում: «Նախաձեռնության շրջանակներում նվիրաբերվել են նաեւ միկրոսկոպով ակնոցներ, որը նորածնային վիրաբուժության համար շատ ակտուալ է»,-ասաց նա:

ՀՀ-ում ԱՄԷ դեսպան Ջասիմ Մուհամմադ Ալ Քասեմին էլ նշեց, որ նախաձեռնությունը շարունակական բնույթ է կրելու: «Երեխաները մեր ապագա սերունդն են, եւ հենց այդ պատճառով մենք հնարավորության սահմաններում փորձեցինք օգնել այս երեխաներին: Այս հիվանդանոցի ղեկավարությունը բուժման հետ միասին երեխաներին օգնում է նաեւ մարդասիրական առումով»,-հավելեց դեսպանը:

1961թ. «Մուրացան» հիվանդանոցային համալիրում հիմնադրվել է մանկական վիրաբուժության առաջին կլինիկան, որտեղ պատրաստվել են հանրապետությունում մանկական վիրաբուժական առաջին կադրերը: 1961-1965թթ. կլինիկայի առաջին ղեկավարը եղել է պրոֆեսոր Անդրեյ Բաղդասարի Գևորգյանը: 1965-1972թթ. կլինիկան ղեկավարել է պրոֆեսոր Էմմա Սերգեյի Մարտիկյանը, իսկ 1972-1998թթ.` պրոֆեսոր Ալբերտ Անդրանիկի Վանյանը: < i>Այնուհետև մանկական վիրաբուժության կլինիկան տեղափոխվել է 1-ին մանկական հիվանդանոց: 2011թ. ԵՊԲՀ-ի «Մուրացան» հիվանդանոցային համալիրում վերաբացվել է կլինիկան, որը մինչ օրս ղեկավարում է ՀՀ վաստակավոր մանկական վիրաբույժ (բարձրագույն կատեգորիայի) Ավետ Արսենի Ասլանյանը: Կլինիկան ծավալված է 12 մահճակալով: Այստեղ տարեկան բուժվում է շտապ-անհետաձգելի և պլանային բուժման արիք ունեցող 600-ից ավելի նորածին և երեխա: Նրանց մի մասն ընդունվում է շուրջօրյա գործող արտագնա վիրաբուժական բրիգադի միջոցով: Վիրահատությունների մի մասը կատարվում է լապարասկոպիկ եղանակով: