Թուրքիան Գերմանիայից պահանջում է վերադարձնել այդ երկրում գտնվող իր զինվորականներին

 Թուրքիայի պաշտպանության նախարար Ֆիքրի Ըշըքը կոչ է արել Գերմանիայի իշխանություններին ապաստան չտալ իրենց դիմած թուրք զինվորականներին: Ինչպես հաղորդում է «Արմենպրես»-ը, այս մասին տեղեկացնում է Deutsche Welle-ի թուրքական ծառայությունը:

Գերմանական մամուլում տեղ էին գտել հրապարակումներ այն մասին, որ բարձրաստիճան թուրք զինվորականները ապաստան են խնդրել գերմանական կողմից: Ի պատասխան նման լուրերի` Ըշըքըն ասել է. «Գերմանական դատարանն ու իշխանությունները լրջորեն պետք է ուսումնասիրեն խնդիրը և կտրականապես մերժեն ապաստան տրամադրելու դիմումները»:

Նախարարն ընդգծել է, որ փետրվարի 15-ին Մյունխենում ՆԱՏՕ-ի անդամ երկրերի պաշտպանության նախարարների հավաքի ժամանակ հանդիպելու է գերմանացի գործընկերոջ հետ և քննարկելու այս հարցը: «Դա անընդունելի է: Ակնկալում ենք Գերմանիայից, որ ապաստան տրամադրելու դիմումները առհասարակ չքննվեն, և ապահովվի այս պահին Գերմանիայում գտնվող գյուլենականների վերադարձը Թուրքիա»,- հայտարարել է Թուրքիայի պաշտպանության նախարարը:

Գերմանիայի տարածքում գտնվող ՆԱՏՕ-ի ռազմաբազաներում ծառայություն իրականացնող շուրջ 40 թուրք զինծառայողգերմանական իշխանություններին դիմում են ներկայացրել ապաստան ստանալու խնդրանքով: Ներգաղթի ու փախստականների հարցերով դաշնային վարչությունը և Գերմանիայի ՆԳ նախարարությունը հայտնել են, որ նրանց գործերը քննվելու են սովորական կարգով:

«Անկասկած, մենք չենք կարող այդ զինվորականներին ուղարկել հետ` Թուրքիա: Նրանց այնտեղ անմիջապես կբանտարկեն»,- Spiegel-ին ասել է Բունդեսթագի իշխող Քրիստոնեա-դեմոկրատական և Քրիստոնեա-սոցիալական միության (CDU/CSU) ներկայացուցիչ Շտեֆան Մայերը: