Լյուդմիլա Սարգսյան. «Իշխանությանը հաղթելու միակ տարբերակը ընտրություններից առաջ միասնական ընդդիմություն կազմելն է»

«Հայ ազգային կոնգրես» խմբակցության պատգամավոր, ՎՍՀԴԿ ատենապետ Լյուդմիլա Սարգսյանը Past.am-ի հետ զրուցեց Վերակազմյալ սոցիալ–դեմոկրատ հնչակյան կուսակցության՝ այս շրջանում այլ քաղաքական ուժերի հետ հնարավոր համագործակցության և Գագիկ Ծառուկյանի՝ քաղաքական դաշտ վերադարձի մասին:

«Փաստի»՝ ՎՍԴՀԿ–ն այս պահին քաղաքական ո՞ր ուժերի հետ է բանակցում և ՎՍԴՀԿ–ԲՀԿ հարաբերություններն ի՞նչ փուլում են հարցին, Լյուդմիլա Սարգսյանը պատասխանեց, որ բանակցում են դաշտում խաղացող բոլոր ուժերի հետ, այդ թվում նաև «Բարգավաճ Հայաստան» կուսակցության հետ՝ փորձելով հասկանալ, թե ում հետ է նախընտրելի իրենց մասնակցությունը և՛ գաղափարական, և՛ ապագայի հետ կապված տեսլականի մոտեցումների մասով: ՎՍՀԴԿ ատենապետի խոսքով, թե ինչ վերջնարդյունքի կգան՝ պարզ կլինի մեկ–երկու օրից: Նրա խոսքով, վերջնական որոշումը կլինի Գագիկ Ծառուկյանի հետ հանդիպելուց և խոսելուց հետո:

Մեր այն դիտարկմանը, թե հավանակա՞ն է, որ հենց ԲՀԿ–ի հետ լինի համագործակցությունը, տիկին Սարգսյանը պատասխանեց, թե չի կարող ասել հավանական է, թե ոչ, բայց բոլոր քաղաքական ուժերի հետ բանակցությունների արդյունքում կազմել են իրենց կարծիքը, «Բարգավաճ Հայաստան» կուսակցության հետ ևս, բայց քանի որ Գագիկ Ծառուկյանը նախաձեռնել է մեծ համախմբում, բնական է, որ պիտի խոսեն նաև նրա հետ:

Առավել հավանակա՞ն եք համարում, որ հենց Գագիկ Ծառուկյանի կողքին պիտի հավաքվեն բոլոր ընդդիմադիր ուժերը հարցին՝ պատգամավորը պատասխանեց, որ ամենամեծ համախմբման հնարավորությունն ունի Գագիկ Ծառուկյանի դաշինքը, պայմանավորված հենց Գագիկ Ծառուկյան անձով: Այն հարցին, թե տեսնում է նա իր մուտքը խորհրդարան ԲՀԿ ցուցակով՝ վերջինս ասաց, որ Գագիկ Ծառուկյանը հանդես է եկել մեծ համախմբման կոչով, հետևաբար Գագիկ Ծառուկյանը դաշինք է ձևավորելու: «Եթե կկարողանանք գալ համաձայնության և վերջնական որոշում ունենալ Գագիկ Ծառուկյանի դաշինքով մասնակցության վերաբերյալ, բնականաբար դա կլինի կուսակցությունների դաշինք, այդ թվում նաև մեր»,– հավելեց նա:

Լյուդմիլա Սարգսյանը նաև վստահ է, որ Գագիկ Ծառուկյանի վերադարձը այս ընտրությունների ժամանակ կտանի նաև ՀՀԿ–ի ձայները. «Վստահ եմ, որ այդպես է լինելու: Նաև ասեմ, որ ՀՀԿ–ի համար Գագիկ Ծառուկյանի վերադարձը ցանկալի չէր, այդ թվում նաև շատ ընդդիմադիր կուսակցությունների, դաշինքների համար: Բայց փաստ է, որ մարդը հայտարարել է իր վերադարձի մասին: Հետևաբար բոլորը վերադասավորման և վերաիմաստավորման խնդիր ունեն գալիք ընտրություններում»,– նշեց մեր զրուցակիցը:

Հարցին, թե այդ դեպքում բոլորից շատ մտավախություններ ՀՀԿ–ն պիտի՞ ունենա, վերջինս պատասխանեց, որ Ծառուկյանին ձայն տվողները «Հանրապետական» կուսակցության համակիրները չեն, դա ավելի շատ ընդդիմադիր ընտրազանգվածն է. «Այնպես, որ հավասարաչափ մտահոգվելու իրավունք ունեն և՛ իշխանությունը, և՛ ընդդիմությունը: Այնպես չի, որ Ծառուկյանը միայն իշխանական ձայներն է տանելու: Ծառուկյանն ունի մեծ համակրանք ընդհանրապես հասարակության մեջ, որի մեջ մտնում են և՛ ընդդիմադիրները, և՛ դիմադիրները»: 

Ըստ Սարգսյանի՝ եթե կլինի Գագիկ Ծառուկյան դաշինք և դրան կընդգրկվեն մեծաքանակ քաղաքական ուժեր, ապա Ազգային Ժողովը կլինի շատ ավելի հետաքրքիր, գունեղ և այնտեղ ներգրավված կլինեն բազմաքանակ կուսակցություններ իրենց մոտեցումներով, իրենց վերաբերմունքով այս կամ այն հարցին: Նա այն համոզմունքն ունի, որ եթե ընդդիմադիր ուժերը միավորվեն մեկ դաշինքի տակ, «Հանրապետական» կուսակցությունը հնարավորություն չի ունենա իշխանություն ձևավորելու և ԱԺ–ում կդառնա ընդդիմություն: 

«Թե ինչ կերպ կպայմանավորվեն Օսկանյանական թևը, ինչ նպատակներ կհետապնդի, կմիավորվի Գագիկ Ծառուկյանին, թե ոչ՝ դրանով պայմանավորված շատ բաներ կփոխվեն»,– հավելեց նա:

ԼԻԼԻ ԹԵՎՈՍՅԱՆ