Հրանուշ Հակոբյանն «Ակոս» թերթը Հրանտ Դինքի ամբողջ գաղափարախոսության շարունակությունն է համարում

 Հրանտ Դինքը, որպես խիզախ, համարձակ անհատականություն դաս եւ օրինակ է հատկապես երիտասարդության համար: Այս մասին Սփյուռքի նախարարությունում «Հրանտ Դինք. 10 տարի անց» կլոր-սեղան քննարկման ժամանակ լրագրողների հետ ճեպազրույցում ասաց  ՀՀ Սփյուռքի նախարար Հրանուշ Հակոբյանը: Նրա խոսքով` Հրանտ Դինքի գաղափարները, մտքերը, տեսակետները ապրում են եւ կշարունակեն ապրել, որովհետեւ նրա մտածողության մաշտաբները շատ լայն էին, իսկ  նրա ստեղծած «Ակոս»  թերթը հենց շարունակությունն է Դինքի ամբողջ գաղափարախոսության:

«Թուրք ստահակ չարագործի ձեռքով 10 տարի առաջ այս օրը զոհվեց մեր ամենամեծ հայերից մեկը, եւ այսօր աշխարհի առաջադեմ մարդկությունը, ողջ հայ ժողովուրդը, թուրք մտավորականությունը սգում է եւ հիշում  Հրանտ Դինքի մահը»,-«Արմենպրես»-ի հաղորդմամբ՝ ասաց նախարարը՝ հավելելով, որ  կլոր սեղանի նպատակը խոնարհումն է Դինքի հիշատակի առաջ: «Շատ բան ունենք սովորելու Հրանտից, նաեւ որպես գիտնական, լրագրող: Նրա յուրաքանչուր հրապարակախոսական հոդված, կամ գիրք վերլուծելով , մեր գիտական հասարակությունը կարող է շատ բան վերցնել»,-հավելեց Հրանուշ Հակոբյանը:

2007 թվականի հունվարի 19-ին սպանվեց  նշանավոր պոլսահայ լրագրող, Թուրքիայում հայերեն և թուրքերեն լեզուներով տպագրվող միակ ամսաթերթի՝ «Ակոսի» գլխավոր խմբագիրը, Թուրքիայի երևելի մտավորականերից մեկը, որը հայտնի էր իր անվախ ելույթներով, քաղաքական ամենախճճված խնդիրները մեկնաբանող համարձակ հոդվածներով։ Հրանտ Դինքը մեկն էր Թուրքիայում ապրող հայ մտավորականներից, ով, միշտ իր մտահոգություններն էր հայտնում թուրքերի և հայերի միջև լարված հարաբերությունների վերաբերյալ: