«Ռիտայի հետ ծանոթացել եմ համացանցում». Կարո Հովհաննիսյանն իր նշանադրության և իր ընտրյալի մասին

Tert.am-ը գրում է

«Վերադարձ», «Դժվար ապրուստ» և այլ  հեռուստասերիալներից հայտնի Կարո Հովհաննիսյանն օրեր առաջ նշանադրվել է 24-ամյա Ռիտա Մարգարյանի հետ: Դերասանը նշանադրությունից հետո առաջինը Tert.am Life-ին է պատմել ընտրյալի և նշանադրության մասին:

 «Մենք կատարեցինք մեր համատեղ կյանքի առաջին լուրջ քայլը: Խոստումնալից և շատ պատասխանատու պահ էր: Մեծ նշանադրություն չի եղել: Մեր երկուսի ընտանիքի անդամներն են եղել ու վերջ: Բայց այնպես ստացվեց, որ մեզ հետ միասին սկսեցին ուրախանալ ու շնորհավորել սրահում գտնվող օտար մարդիկ: Ընդհանուր ուրախություն էր տիրում այդ պահին»,- ասաց Կարոն:

 Դերասանը նշեց, որ հատուկ անակնկալ չի եղել ո՛չ իր, ո՛չ Ռիտայի կողմից: Նրանք միասին են զբաղվել կազմակերպչական հարցերով՝ սկսած նվերների ընտրությունից, վերջացրած մատանիով: «Մատանու ընտրությունը Ռիտայինն էր: Այստեղ չկար իր ուզած մատանին և մենք պատվիրեցինք»,- նշեց դերասանը:

 Կարոյի սիրելին մասնագիտությամբ դիզայներ-նկարչուհի է: Սովորում է Մոսկվայում: Ռիտան չորրորդ կուրսում է։ Շուտով Կարոն և սիրելին կմեկնեն Մոսկվա, Ռիտան կավարտի համալսարանն ու կվերադառնան Հայաստան։ «Շատ տաղանդավոր դիզայներ է, շատ լավ մարդ, կողակից, ընկեր, քույր: Ամեն ինչով համապատասխանում է այն իդեալին, որն ունեցել եմ: Իր հետ ծանոթացել եմ համացանցում: Instagram-ում պատահական տեսնելով իր լուսանկարները՝ սկսել եմ շփվել իր հետ: Հետո պարզվեց, որ ա գալու է Հայաստան հանգստանալու: Այդ ժամանակվանից մենք սկսեցինք հանդիպել և կապն ավելի խորացավ: Մի ամիս այստեղ մնալուց հետո նա նորից մեկնեց Մոսկվա: Կարճ ժամանակ անց թողնելով այնտեղ ամեն ինչ՝ տունը, մեքենան, ուսումը, տեղափոխվեց Հայաստան, և կատարեցինք մեր համատեղ առաջին քայլը: 5 ամիս ենք շփվել: 6-րդ ամսին որոշեցինք նշանվել: Ամեն ինչ արագ ստացվեց, քանի որ իմաստ չկար երկարացնելու ու սպասելու: Առաջին իսկ հանդիպումից այնպիսի զգացողություն կար, կարծես մենք երկար տարիներ ճանաչել ենք իրար: Զարմանալի էր, որ միանգամից իրար հասկացանք ու ավելի լավ լեզու գտանք իրար հետ, չնայած նա Ռուսատանում էր ապրել, ես՝ Հայաստանում»:

 

 Հարցին, թե ինչու այդպես արագ որոշեցին նշանադրվել, դերասանը պատասխանեց. «Երբ հասկանում ես, որ հանդիպել ես այն մարդուն, որը քեզ համար է, պետք չէ սպասել: Հատկապես, որ կյանքը շատ կարճ է սպասելու համար: Պետք է անել այնպես, ինչպես սիրտդ է ուզում: Բացի այդ, անցյալի մեր կատարած քայլերից հետևություն անելով հակացանք, որ պետք չէր երկարացնել: Անցյալում մենք իրար հետ կապ չենք ունեցել, բայց այնպես է ստացվել, որ երկուսիս կյանքում էլ եղել է ինչ-որ մեկը, որը հիմա չկա։ Հենց դրանից հետո մենք հանդիպեցինք։ Եթե այդ դեպքերը չլինեին, երկուսիս կյանքն էլ այլ կերպ կդասավորվեր և չէինք հանդիպի»:

 Դերասանը նշեց, որ հնարավոր է այս տարի ինքն ու Ռիտան կատարեն իրենց երկրորդ քայլը՝ ամուսնանան: «Եթե ամեն ինչ լավ լինի, մենք այս տարի էլ կպսակադրվենք: Դեռ ոչինչ հստակեցված չի: Երբ ամուսնանանք, այստեղ կբնակվենք ու կաշխատենք, իսկ եթե ինչ-որ բան չստացվի, կմեկնենք արտերկիր: Բայց դա ամենավերջին քայլը կլինի, քանի որ սա մեր հարազատ երկիրն է, սա է մեր տունը և անկախ դժվարությունից մենք այստեղ կապրենք: Ինձ համար շատ կարևոր է, որ իմ ընտանիքը այստեղ ձևավորվի, իմ ապագա երեխաներն այստեղ մեծանան»,- եզրափակեց Կարոն: