Մենք շատ խենթ զույգ ենք, իսկը իրար համար ենք ստեղծված. Միլենա Ոսկանյանը` ամուսնու ու պարարվեստի մասին

Երգիչ Արմեն Շահվերդյանի կինը` պարուհի Միլենա Ոսկանյանը, Life.panorama.am-ին պատմել է ոչ միայն իրենց նորակազմ ընտանիքի, այլեւ աշխատանքային ծրագրերի մասին:

Խոսելով իրենց սերը պահպանելու բանաձեից` Միլենան պատմեց.

«Ճիշտն ասաց` չգիտենք էլ, թե ինչպես ենք պահպանում մեր մշտական սիրահարվածությունը, ամեն ինչ ինքնաբերաբար է ստացվում` առանց ավելորդությունների: Մենք շատ խենթ զույգ ենք, իսկը իրար համար ենք ստեղծված: Նախկինում իմ կողքին հանգիստ տղամարդու չէի պատկերացնում, իմ տղա տեսակը պետք է լիներ կողքիս ու եղավ»:

Մեր նկատառմանը, թե ինչպե՞ս է կայանում Հայաստանում մեծացած կնոջ ու օտար երկրում ապրած հայ տղամարդու հարաբերությունները, պարուհին նշեց.

«Երբ տարիներ առաջ սկսեցի շփվել Արմենի հետ, նկատեցի, որ շատ դրական էներգիա փոխանցեց ինձ: Նա շատ անմիջական ու անկեղծ մարդ է, ինչը անչափ գնահատելի է ինձ համար: Նա միշտ էլ ասել է, որ իր կինը պետք է հենց հայաստանցի լինի, որովհետեւ շատ է սիրում հայկական խոհանոցը, բացի այդ նրա համար շատ կարեւոր է եղել, որ իր կինը հայ ընտանիքում մեծացած եւ դաստիարակություն ստացած լինի»:

Արվեստագետ ամուսինների փաստը զույգի համար մեծ առավելություն է.

«Ես երբեք իմ կողքին չէի պատկերացնի արվեստից հեռու մարդու, որովհետեւ այդ պարագայում ինձ չէր հասկանա եւ ես էլ ստիպված կլինեի թողնել մասնագիտությունս: Մեզ շատ է օգնում այդ փաստը, որ նույն բնագավառից ենք, իրար շատ ենք օգնում, խորհուրդներ ենք տալիս»,- ժպիտով հավելեց նա:

Անդրադառնալով պարարվեստին, Միլենա Ոսկանյանը նշեց.

«Պարն ինձ համար ոչ միայն ապրելակերպ է, այն նաեւ էմոցիաներս ու էներգիաս արտահայտելու միջոց է: Այժմ պարում եմ «Swag art school»-ում, որի գեղարվեստական ղեկավարն է Հովհաննես Սարգսյանը: Մեր խմբի անդամներով պարում ենք երեւանյան ռեստորաններից մեկում»:

Պարուհու խոսքով` Հայաստանում պարարվեստը դեռ շատ զարգանալու ճանապարհ ունի.

«Ըստ իս` պարը մեզ մոտ շատ զարգանալու եւ աճելու տեղ ունի, որովհետեւ եթե ես համարվում եմ Հայաստանում լավագույն պարողներից մեկը, ապա դրսում ոչինչ եմ: Շատ ցավալի է այդ փաստը, տարիներ շարունակ աշխատում ես, պարապում ինքդ քեզ վրա, բայց մեկ է, քիչ է»,- ընդգծեց նա:

Վերջում Միլենա Ոսկանյանը նշեց, որ այս տարի ամուսինը շատ ծրագրեր ունի իրագործելու, որոնց ինքը եւս անհամբերությամբ է սպասում, սակայն ինքն իր աշխատանքները չի ծրագրում, ամեն բան թողնելով, որ ինքնաբերաբար ստացվի: