Սովորական խաբեությո՞ւն, թե՞ գնորդին մոլորեցնելու օնլայն հարթակ

ՀԱՍԱՐԱԿՈՒԹՅՈՒՆ 28 Դեկտեմբեր, 2016 23:11

Ամանորից առաջ, երբ շատերը զբաղված են տոնական առևտրով կամ մտերիմների համար անակնկալ նվերներ գնելով, Past.am-ի ուշադրության կենտրոնում հայտնվեց liveauction.am կայքը: Ուսումնասիրելով կայքը պարզ է դառնում, որ այստեղ, կարծես թե, ամեն ինչ չէ, որ կարելի է բավարար համարել: Ի դեպ, այն արդեն մեկ տարվա պատմություն ունի և փաստորեն այս ընթացքում սպառողները հնարավորություն են ունեցել օն–լայն տարբերակով աճուրդ–վաճառքի մասնակցել և տարբեր ապրանքներ ձեռք բերել, սակայն միշտ չէ, որ մասնակիցները գոհ են մնում կայքի ծառայությունից:

Օրերս աճուրդի մասնակից Կարեն Ամիրաղյանին հաջողվել է աճուրդի մասնակցել և 6000 դրամով հեռուստացույց գնելու հնարավորություն ստանալ, բայց կարճ ժամանակ անց պարզվել է, որ կայքի տնօրինությունը աճուրդը չկայացած է համարել և մասնակիցը չի կարող հեռուստացույցը նշված գնով ձեռք բերել:

Այդ լուրը Կ. Ամիրաղյանին տեղեկացրել են հեռախոսով, նշելով, որ իրականում ծրագրային խնդիրներ են եղել, իսկ աճուրդից հետո նրա ստացած հաղորդագրությունը՝ սխալմունք:

Ի դեպ, ինչպես նշված է պայմանագրում՝ կայքի անխափան աշխատանքն ապահովելը կազմակերպչի պարտավորությունն է: Այսինքն, աճուրդի մասնակիցները որևէ կերպ չեն կարող տուժել, եթե կայքն այդ պահին խնդիր է ունեցել: Կազմակերպիչը պատասխանատվություն է կրում, նաև լոտի այն թերությունների համար, որոնց մասին տեղյակ է եղել կամ պետք է տեղյակ լիներ, սակայն չի զգուշացրել աճուրդի մասնակիցներին:

Աճուրդը կայանալուց ու շնորհավորական հաղորդագրություն ստանալուց հետո կազմակերպչի կողմից այն չեղյալ հայտարարելը պարզ խաբեություն է, որից կազմակերպիչը ցանկացած պահի կարող է օգտվել և մեղքը գցել ծրագրային խնդիրներ ունենալու վրա:

Ի դեպ, ընկերության Ֆեյսբուքյան էջի ուսումնասիրությունը նույնպես վկայում է այն մասին, որ ընկերության էջում տեղադրված և սոցիալական ցանցով տարածվող կայքի գովազդը նույնպես սպառողներին մոլորեցնելու միտումներ է հետապնդում: Օրինակ, գովազդային բովանդակություն ունեցող գրառումներից մեկով տեղեկացվում է, որ տվյալ ապրանքը կարելի է գնել աճուրդի մեկնարկային գնով: Չնայած, որ սպառողն ինչան էլ մեծ ցանկություն ունենա, աճուրդին ներկայացված ապրանքն այդ գնով չի կարող գնել, քանի որ նախապես հայտարարված մեկնարկային գնին, ուզենք թե չուզենք, ավելանում է աճուրդի մասնակիցների կողմից առաջարկվող ինչ–որ «իքս» գումար, որն էլ, մասնակիցների կամքից անկախ մեծացնում է տվյալ ապրանքի աճուրդի մեկնարկային գինը:

Past.am-ը այս և այլ հարցերը պարզաբանելու նպատակով փորձեց զրուցել կայքի պատասխանատուի հետ, ով խոստացավ բարձրացված հարցերն ուսումնասիրել և ապա նոր պատասխանել մեր հարցերին: Մինչ այս պահը նա դեռևս չի արձագանքել, իսկ մենք հարցը փակված չենք համարում:

Արմինե Գրիգորյան