Երեւանում բիոպսիայի ժամանակ հիվանդ է մահացել, հարազատները մեղադրում են բժշկին

News.am-ը գրում է.

Երեւանի  Վ. Ա. Ֆանարջյանի անվան ուռուցքաբանության ազգային կենտրոնում դեկտեմբերի 12-ին մահացած 60-ամյա Խաչիկ Մուրադյանի մահվան մեջ հարազատները մեղադրում են բժիշկ Վահագն Խաչատրյանին։ NEWS.am-ի հետ զրույցում հարազատները պատմեցին, որ Խաչիկ Մուրադյանը մեկուկես ամիս առաջ սրտի կաթված էր ստացել։

Ստեփանավանում հետազոտության արդյունքում Խաչիկ Մուրադյանի մոտ գոյացություն էին հայտնաբերել, ինչի համար էլ ուղեգրել էին Երեւան։ Ըստ հարազատների՝ Երեւանում ԿՏ հետազոտությամբ հայտնաբերել էին պրեֆերիկ ուռուցք, այնուհետեւ ուղարկել էին Ուռուցքաբանության կենտրոն՝ հետագայում բուժման նպատակով։

«Դեկտեմբերի 9-ին Խաչիկ Մուրադյանը գնում է Ուռուցքաբանության կենտրոն, մի քանի կաբինետներով պտտվելուց հետո մեզ ընդունում է բժիշկ Վահագն Խաչատրյանը, որն էլ մեզ ուղարկում է հետազոտության, քանի որ հերթը մեծ էր, որոշեցինք դեկտեմբերի 12-ին գնալ՝ երկուշաբթի օրը, ժամ էինք պայմանավորվել, էդ օրը գնացել ենք, էլեկտրասրտագրություն (ԷԿԳ) են արել, պարզվել է՝ ունի առիթմիա, բժիշկը որոշեց բիոփսիա անել՝ առանց նունիսկ ճնշումը չափելու եւ հետաքրքրվելու՝ ալերգիա ունի թե ոչ։ Էնքան լավ էր զգում, որ իրա ոտքով էր գնացել հիվանդանոց, շատ լավ տրամադրությամբ գնացել էր»,- պատմեց հարազատներից մեկը։

Ըստ հարազատների՝ Խաչիկ Մուրադյանը մահացել է բիոպսիա անելու ընթացքում։ Բժիշկների խոսքով՝ Մուրադյանի մոտ սրտի կանգ է գրանցվել, մինչդեռ հարազատները համոզված են, որ նման պայմաններում սրտի կաթված տարած տղամարդուն հակացուցված է բիոպսիա անելը։ Այս մասին հարազատներն իմացել են Մուրադյանի մահվանից հետո։

«Մենք ոստիկանություն բողոք չենք ներկայացնի, ուղղակի ուզում ենք, որ դեպքը արձանագրվի, որ հանրությունը իմանա՝ ինչ վերաբերմունք կա հիվանդանոցներում պետպատվերով հիվանդների նկատմամբ, բժիշկները մատների արանքով են նայում։ Ու չնայաց պետպատվեր էր, մեզնից 15-20 հազար ուզեցին բիոպսիայի համար, իսկ հետո դիահերձման համար 55 հազար պահանջեցին, հիվանդանոցում էլ ասեցին, որ բժիշկը կվճարի։ Եթե բժիշկը անմեղ է, ինչու՞ են ասում, որ նա կվճարի, իսկ բժիշկն էլ կանգնել մեզ ասում էր՝ ի՞նչ իմանայի, որ էդպես կլինի»,- ասաց հարազատներից մեկը։

Նշենք, որ Խաչիկ Մուրադյանը 3-րդ կարգի հաշմանդամ էր, բնակվում էր Ստեփանավանում։