Տավուշի մարզի 59 ընտանիք նոր ջերմոցներ կունենան

«Հայաստան» հիմնադրամն իր արգենտինահայ բարերարների ֆինանսավորմամբ Տավուշի մարզի 10 համայնքներում մեկնարկում է ջերմոցների կառուցման երրորդ փուլը: 

Ոսկեվան, Արծվաբերդ, Կոթի, Ներքին Ծաղկավան, Բերդավան, Այգեհովիտ, Կողբ, Զորական, Դիտավան, Կիրանց գյուղերի 57 շահառու ընտանիքների տնամերձ հողատարածքներում կկառուցվեն 100քմ մակերեսով, մետաղյա կառուցվածքով եւ բարձրորակ ծածկով ջերմոցներ: Երկու ջերմոց էլ Հիմնադրամի Ավստրալիայի տեղական մարմնի հովանավորությամբ կկառուցվի Խաչարձանում: Ջերմոցների շահագործման նախնական փուլում գյուղացիներին միանվագ կնվիրաբերվեն սածիլներ եւ կտրամադրվի անվճար խորհրդատվություն: Այս մասին «Արմենպրես»-ին տեղեկացրին հիմնադրամից:

Ծրագրի համակարգող Մարիամ Ջենջիրջյանի խոսքով՝ շահառուներն ընտրվում են վիճակահանության միջոցով եւ համաֆինանսավորման պայմանով: Համայնքներն ընտրելիս հիմք է ընդունվել կառավարության կողմից սահմանված սահմանամերձ համայնքների ցանկը: 59 ջերմոցի կառուցման համար այս փուլում հայտ էր ներկայացրել 100 մենատնտես: Մեկ ջերմոցի արժեքը կազմում է 5 400 ԱՄՆ դոլարին համարժեք դրամ, որից 200 000 ՀՀ դրամը վճարում է շահառուն: «Տարեցտարի մարզում ավելանում է ջերմոցային տնտեսություն վարողների թիվը՝ 10-ից հասելով 102-ի: Հուսանք, որ 2017թ.-ին նախատեսված էլեկտրաէներգիայի սակագնի նվազումը կթեթեւացնի ջերմոցային տնտեսությամբ զբաղվողների ֆինանսական բեռը»,- ասում է ծրագրի համակարգողը: 
Առաջին եւ երկրորդ փուլերի /2013-15թթ./ արդյունքում Դիտավան, Կիրանց, Բաղանիս, Այգեհովիտ, Վազաշեն, Գանձաքար եւ Խաչարձան գյուղերի 43 մենատնտես ջերմոցների շահագործման շնորհիվ ստանում է կայուն եկամուտ: