ԱԺ պատգամավոր Լյուդմիլա Սարգսյանի կարծիքով ընդդիմադիր կուսակցությունների համար բավականին բարդ է լինելու

ՔԱՂԱՔԱԿԱՆ 14 Դեկտեմբեր, 2016 19:40

Վերակազմյալ «Սոցիալ–դեմոկրատական հնչակյան» կուսակցության ատենապետ, ԱԺ ՀԱԿ խմբակցության պատգամավոր Լյուդմիլա Սարգսյանը Past.am-ի հետ զրույցում նշեց, որ իր ղեկավարած կուսակցությունն անպայման մասնակցելու է առաջիկա խորհրդարանական ընտրություններին, բայց դեռևս որոշում չկա, թե ում հետ իրենք դաշինք կկազմեն: Քաղաքական գործչին ուրախացնում է, որ որոշ կուսակցություններ սկսել են համախմբման մասին խոսել, իսկ իրենց քայլերի մասին կխոսի մեկ ամսից:

«Հույս ունեմ, որ գնալով այդ համախմբման տենդենցը կմեծանա: Ինչ վերաբերում է մեր կուսակցությանը, ապա մենք թեև ակտիվ շփումների մեջ ենք տարբեր քաղաքական ուժերի հետ, սակայն դեռևս վերջնական եզրահանգման չենք եկել»,– ասաց Լ. Սարգսյանը:

Մեկնաբանելով «Ռեֆորմիստներ» կուսակցության նախագահ Վահան Բաբայանի հնչեցրած տեսակետը, թե ընդդիմադիր կուսակցությունները պատրաստ չեն հաղթանակ տանելու և ընդամենը պետք է տեղ զբաղեցնեն ԱԺ–ում, Լ. Սարգսյանը պատասխանեց:

«Իրականում ընդդիմադիր ուժերն են, որ փորձում են ինչ–որ բան փոխել երկրում և ընդհակառակը Վ. Բաբայանն է մտածում ԱԺ–ում տեղ զբաղեցնելու մասին, ընդ որում մենակ»,– ասաց Լ. Սարգսյանը:

Նա թեև դժվարանում է ասել, եթե ի վերջո ընդդիմությանը կհաջողվի համախմբել ուժերը և միասնական ճակատով հանդես գալ առաջիկա ընտրություններին, սակայն իր կարծիքով ընդդիմության շանսերը միայն մեկ կամ երկու բևեռով հանդես գալու դեպքում մեծ կլինեն: Հակառակ դեպքում չեն կարողանա այլընտրանք դառնալ և ինչու չէ՝ նույնիսկ հաղթել գործող իշխանությանը:

«Ես կարծում եմ, որ նույնիսկ եթե ընդդիմադիր մեկ բևեռ էլ ձևավորվի, ապա այդ դեպքում իշխանության այլընտրանքը ապահովված կլինի, իսկ ընդդիմադիր բոլոր ուժերն առանձին–առանձին հանդես գալու դեպքում չեն կարողանա հաղթահարել 5%–անոց արգելքը և կպարտվեն: Եվ որքան էլ խոսվում է կուսակցությունների դերի բարձրացման մասին, նոր Սահմանադրությամբ, ըստ էության բավականին դժվար է լինելու անցողիկ տոկոս ապահովել կուսակցությունների համար, քանի որ ռեյտինգային ընտրությունը իշխանությանը լայն հնարավորություն է տալիս մեծամասնություն կազմելու»,– ասում է Լ. Սարգսյանը:

Պատգամավորի կարծիքով ընդդիմության համար դժվար է լինելու նաև թե՛ ֆինանսական ռեսուրսների, թե՛ բոլոր մարզերում 5–ից մինչև 20 որակապես մրցունակ թեկնածու ներկայացնելու առումով, իսկ «Ժառանգություն» կուսակցության փոխնախագահ Արմեն Մարտիրոսյանի հնչեցրած տեսակետը, թե իրենց կուսակցությունը առանց համախմբվելու էլ կարող է հաղթահարել 5%–անոց արգելքը, պատգամավորն ասաց, որ չնայած կուսակցությունը փորձառու է և նախկինում իրենց հաջողվել է հաղթահարել 5%–անոց արգելքը, սակայն ներկայի «Ժառանգությունն» այլևս 2005–2007 թվականների կուսակցությունը չէ:

«Բայց եթե իրենց հաջողվի նման արգելք հաղթահարել, ապա ես իրենց միայն հաջողություն կմաղթեմ»,– ասաց Լ. Սարգսյանը:

Արմինե Գրիգորյան