«Երանի»-ի դերասանուհի Իրինա Այվազյանը` պլաստիկ միջամտության ենթարկվելու լուրերի մասին

Երբ որեւէ դերասան կամ դերասանուհի հասնում է որոշակի հայտնիության, ուզի նա դա, թե ոչ, նրա մասին սկսում են հյուսվել տարբեր խոսակցություններ: Դրանցից որոշները համապատասխանում են իրականությանը, մինչդեռ շատերը այդպես էլ մնում են բամբասանք:

Վերջերս նմանատիպ ասեկոսեները սկսեցին անհանգստացնել նաեւ «Երանի» հեռուստասերիալում Լիզային մարմնավորող Իրինա Այվազյանին: Երիտասարդ դերասանուհին աչքի է ընկնում իր արտահայտիչ շուրթերով, ինչը շատերի մոտ կասկածներ է առաջացրել` արդյոք Իրինան դիմե՞լ է արհեստական միջամտությունների շուրթերը մեծացնելու նպատակով: 

Պարզաբանում ստանալու համար զրուցեցինք դերասանուհու հետ.

«Որքան էլ, որ դժվար է հավատալ, այդ խոսակցությունները չեն համապատասխանում իրականությանը: Ոչ մի պլաստիկ վիրահատության չեմ դիմել, նաեւ չեմ դիմել այն սարքերի օգնությանը, որոնց միջոցով մեծացնում են շուրթերը»,-նշեց դերասանուհին` տրամադրելով իր մանկության լուսանկարը, որտեղ ընդամենը 6 ամսեկան է եւ արդեն աչքի է ընկնում իր գեղեցիկ շուրթերով:

«Նման մեկնաբանություններից, անկեղծ ասած, մի փոքր նեղվում եմ, բայց գիտեմ, որ դրանցից խուսափելն անհնար է: Չեմ հասկանում այն մարդկանց, որոնք ոչ միայն այդ կարծիքն են արտահայտում, այլեւ տհաճ մեկնաբանություններ են գրում դրա վերաբերյալ: Դա, իսկապես, շատ վիրավորական է»:

Իրինայի  հետ նաեւ զրուցեցինք Լիզայի կերպարից եւ նոր առաջարկներից.

«Իմ կերպարի մասին շատ բան չեմ կարող ասել, քանի որ ինքս էլ չգիտեմ, թե մոտ ապագայում ինչ է սպասում նրան: Ինչ փոփոխությունների էլ, որ նա ենթարկվի, հուսով եմ` հեռուստադիտողին դուր կգա իմ խաղը»,-նշեց դերասանուհին, որն այս ընթացքում նկարահանվելու մի շարք առաջարկներ է ստացել.

«Դրանք ոչ միայն դերասանության, այլեւ հաղորդավարության հետ են կապված: Բայց կարծում եմ` այդ առաջարկները կընդունեմ միայն «Երանի»-ի ավարտից հետո»,-եզրափակեց նա: 

Սյունե Առաքելյան

Աղբյուրը՝ NEWS.am STYLE