Հայաստանում կանանց 27%-ը կարծում է, որ «կինը երբեմն արժանի է ծեծի»

Հայաստանում կանանց 27.3%-ը եւ տղամարդկանց 36.6%-ը կարծում է, որ «կանայք երբեմն արժանի են ծեծի»: Այս մասին են վկայում «Վորլդ Վիժն»-ի հայկական գրասենյակի եւ IPS կազմակերպության կատարած համատեղ հետազոտության արդյունքները:

Վորլդ Վիժն Հայաստանի «Հոգատարություն հանուն հավասարության» ծրագրի ղեկավար Սեւան Պետրոսյանի խոսքով՝ նույն հարցումը ցույց է տվել, որ կանանց 38.5%-ը եւ տղամարդկանց 51.5%-ը վստահ են, որ կինը «պետք է հանդուրժի ընտանեկան բռնությունը՝ հանուն ընտանիքի պահպանման»:

Հետազոտությունն արտացոլել է նաեւ շատ այլ կարծրատիպեր, որոնցով ղեկավարվում են որոշ հայեր: Մասնավորապես, հարցված կանանց 57.5%-ը եւ տղամարդկանց 76.8%-ը հայտարարել է, որ «կնոջ կարեւորագույն դերը տունը մաքրելն ու ճաշ եփելն է»: Տղամարդկանց 79%-ն ու կանանց 61.9%-ը նաեւ հայտարարել է, որ «լավ կինը երբեք չպետք է կասկածի տակ դնի ամուսնու որոշումները, եթե անգամ համաձայն չէ դրանց հետ»:

Հետազոտության հեղինակներն անդրադարձել են նաեւ ընտրողական աբորտների եւ արական սեռի երեխայի նախընտրության խնդրին: Հարցված տղամարդկանց 55.1%-ը եւ կանանց 48.9%-ը նշել է, որ «իսկական տղամարդը պետք է պարտադիր որդի ունենա», իսկ տղամարդկանց 88.8%-ը եւ կանանց 77.3%-ը հավելել է, որ «որդի ունենալը շատ կարեւոր է»:

Ընդհանուր առմամբ, հարցմանը 2690 մարդ է մասնակցել, որոնցից 2053-ն ամուսնացած է եղել, մյուսները՝ ոչ: