Երեւանի եւ Մոսկվայի պետական կրկեսները կհամագործակցեն

 Ռուսաստանի պետական կրկեսի տնօրեն Դմիտրի Իվանովը և Երևանյան կրկեսի տնօրեն Սոս Իոսիֆ Պետրոսյանը Սանկտպետերբուրգյան 5-րդ միջազգային մշակութային ֆորումի շրջանակներում համագործակցության համաձայնագիր են կնքել: «Արմենպրես»-ի հետ զրուցում Երևանի կրկեսի գեղարվեստական ղեկավար, «Հայաստ անի կրկեսային գործիչների միության» նախագահ, պրոֆեսոր Սոս Պետրոսյանը նշեց, որ համագործակցության շրջանակներում ակնկալվում է համատեղ վարպետաց դասեր, դերասանների փոխանակում, համատեղ փառատոններ: «Սանկտպետերբուրգյան միջազգային մշակութային ֆորումին մասնակցել են մի շարք եվրոպական երկրներ եւս: Այս համաձայնագրի շրջանակներում այդ երկրների դերասանների հետ կապված պայմանագրերը կկնքվեն ավելի ցածր արժեքով»,-ասաց նա:

Սոս Պետրոսյանի խոսքով` նման հանդիպումները խթան են հանդիսանում կրկեսային արվեստի զարգացմանը: «Սանկտ Պետերբուրգի թատրոնի եւ կինոյի ինստիտուտում ես հնարավորություն ունեցա դասախոսություններով հանդես գալ: Պատմեցի մեր կրկեսի անցյալի եւ ներկայի մասին: Հետաքրքրությունը բավական մեծ էր»,-ասաց Սոս Պետրոսյանը:

Երեւանյան կրկեսի գեղարվեստական ղեկավարը կարեւորեց կրկեսի հետ կապված յուրաքանչյուր պայմանագրի, համաձայնագրի ստորագրում: «Կրկեսը չորս տարի է, ինչ չի գործում, բայց մենք մեր կապերը գործընկերների հետ չենք խզել եւ ոչ մի օր: Երբ նոր կրկես ունենանք, մեզ համար ավելի հեշտ կլինի»,-ասաց նա, հավելելով, որ կրկեսային տնտեսություն ստեղծելը շատ բարդ է:

Անդրադառնալով կրկեսի շենքի վերանորոգման աշխատանքների ընթացքին, Սոս Պետրոսյանը նշեց, որ աշխատանքներն ընթանում են բնականոն հունով: