Հարավկորեական ընդդիմությունը մերժել Է երկրի նախագահի «պատվավոր» պաշտոնաթողության հնարավորությունը

 Հարավկորեական ընդդիմությունը բացառել Է երկրի նախագահ Պակ Կըն Հեի կամավոր «պատվավոր» պաշտոնաթողության հնարավորությունը: Այդ մասին, ինչպես տեղեկացնում Է «Արմենպրես»-ը, դեկտեմբերի 5-ին հայտարարել Է Դեմոկրատական կուսակցության առաջնորդ Չու Մի Էն:

«Դեկտեմբերի 3-ին երկրի փողոցներ Էին դուրս եկել 2,3 մլն ցուցարարներ, որոնք պարզորոշ հասկանալ տվեցին, որ մերժում են նախագահի կամավոր պաշտոնաթողության՝ «Սենուրի» կառավարող կուսակցության պլանը: Մենք հորդորում ենք «Սենուրի»-ից պատգամավորներին՝ անսալ ժողովրդի ձայնին եւ պաշտպանել Պակ Կըն Հեի պաշտոնազրկումը»,-ասել Է Չու Մի Էն:

«Ժողովրդական ցասումը, որը դրսեւորվեց միլիոնավորների ցույցերով, թույլ չի տա նախագահին հանգիստ վերադառնալ պետության կառավարմանը: Միակ ելքը ինպիչմենտն Է»,-հավելել Է նա:

Իմպիչմենտի շուրջ քվեարկությունը դեկտեմբերի 9-ին տեղի Է ունենալու խորհրդարանում: Բանաձեւը պաշտպանել Է 171 պատգամավոր, որոնց թվում են ընդդիմադիր երեք կուսակցություններից բոլոր օրենսդիրները եւ անկախ պատգամավորները, բացառությամբ խոսնակի: Պակ Կըն Հեին պաշտոնաթող անելու համար հարկավոր Է 200 ձայն (300-ից), իսկ դրա համար անհրաժեշտ Է «Սենուրի»-ի առնվազն 30 ներկայացուցիչների աջակցությունը: Ավելի վաղ նախագահը պաշտոնը թողնելու պատրաստակամություն Է հայտնել, երբ դրա համար ստեղծվեն որոշակի պայմաններ:

Կառավարող կուսակցությունն առաջադրել Է ծրագիր, որին համապատասխան, Պակ Կըն Հեն իր պաշտոնը կամավոր կթողնի 2017 թվականի ապրիլի վերջին: Դա իբր անհրաժեշտ Է, որպեսզի հնարավոր լինի խուսափել «իշխանության վակուումից»: Ընդդիմությունը խիստ քննադատության Է ենթարկել այդ ծրագիրը եւ պնդում Է նախագահի անհապաղ պաշտոնազրկումը:

Պակ Կըն Հեին մեղադրում են իր մտերիմ ընկերուհուն՝ Չխվե Սուն Սիլին հովանավորելու մեջ, որը հայտնվել Է աղմկալի կոռուպցիոն սկանդալի կենտրոնում, հաղորդել Է ՏԱՍՍ-ը: