Ես ուղղակի կցանկանայի՝ գոնե մի ռեալ բան իմանայինք. այդ մարդը կենդանի է, կենդանի չէ. «Կայարանցի Թևոսիկի» եղբոր սպանության գործով վկա

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց քրեական աշխարհում «Կայարանցի Թևոսիկ» մականունով հայտնի Թևոս Սաֆարյանի եղբոր՝ Արթուր Սաֆարյանի սպանության գործի քննությունը:

Նշենք, որ գործի շրջանակում Իսրայել Սարգսյանին մեղադրանք է առաջադրվել ՀՀ Քրեական օրենսգրքի 104-րդ, 38-104-րդ հոդվածներով (սպանություն և սպանությունը պատվիրելը) և 235-րդ հոդվածով (ապօրինի զենք-զինամթերք ձեռք բերելը, իրացնելը, պահելը, փոխադրելը կամ կրելը):

Դատարանում այսօր շարունակվեց վկաների հարցաքննությունը: Գործով վկաներից մեկն ասաց, որ ինքը որոշ ժամանակ առաջ զանգահարել է նախաքննական մարմնի կողմից սպանված ճանաչված Մովսես Ներսիսյանին՝ իր հարազատներից մեկի՝ բանակ զորակոչվելու հարցով: Գործով մյուս վկան էլ հայտնեց, որ Մովսես Ներսիսյանն իր փեսան է:

Նաև նշեց, որ Մովսես Ներսիսյանը շատ համեստ մարդ է եղել: Մեղադրողի հարցին՝ վկային հայտնի՞ է տեղեկություն այն մասին, թե Մովսես Ներսիսյանին այլ անունով դիմե՞լ են, վկան ասաց, որ Ներսիսյանի մորից մի անգամ լսել է, որ նրան դիմել է Արմեն անունով:

Նշենք, որ Մովսես Ներսիսյանի մարմինը չի հայտնաբերվել: Վերջինիս կնոջ մայրը դատարանից հեռանալիս ասաց. «Ես ուղղակի կցանկայի գոնե մի ռեալ բան իմանայինք, ինչպես են ասում, կներեք էլի, մեր աչքն էլ կտրվեր՝ այդ մարդը կենդանի է, կենդանի չէ, էս էրեխեքը ամբողջ օրը կասետները դնում են, նկարները դնում են, նայում են, ինձ վրա ահավոր ազդում է, ես չգիտեմ՝ ինչ պատասխանեմ: Գոնե հույսներս կտրենք, իմանանք չկա, ես էլ իմ էրեխեքին հավաքեմ, թողնեմ գնամ, իմ էրեխուն պադերժկա լինեմ»:

Արաքս Մամուլյան