Տավուշի սահմանամերձ համայնքների դպրոցականներն Ամանորյա նվերներ կստանան

 Եկեղեցիների Համաշխարհային Խորհրդի հայաստանյան միջեկեղեցական բարեգործական Կլոր սեղան հիմնադրամն Ամանորին տոն կպարգեւի Տավուշի սահմանամերձ գյուղերի դպրոցականներին ու ուսուցիչներին: Ինչպես «Արմենպրես»-ի հետ զրույցում ասաց հիմնադրամի ծրագրերի պատասխանատու Կարինե Բաղդասարյանը, նախաձեռնությունն իրականացնելու համար այս տարի 3 միլիոն դրամ կտրամադրվի Հայ առաքելական եկեղեցու Տավուշի թեմին: «Անցյալ տարի նման ծրագրի շրջանակներում Տավուշի սահմանամերձ գյուղերի 6000 ուսուցիչներ եւ դպրոցականներ նվերներ են ստացել Ամանորին»,-ասաց նա:

Անդրադառնալով Հայաստանի սահմանամերձ համայնքներում Եկեղեցիների Համաշխարհային Խորհրդի հայաստանյան միջեկեղեցական բարեգործական Կլոր սեղան հիմնադրամի գործունեությանը, Կարինե Բաղդասարյանը նշեց, որ դրանք իրականացվում են «Օգնենք սահմանին» խորագրով, որի շրջանակներում Իջևանում ստեղծվել է նաև ՀԱԵ Տավուշի թեմի սոցիալական աջակցության «Արևիկ» կենտրոնը, որտեղ համայնքի բնակիչները սոցիալական օգնություն  եւ ուղղորդում են ստանում, նաև մասնակցում նկարչության, բատիկայի , շուղագործության,  գորգագործության դասերի:

«Հաշվի առնելով սահմանամերձ համայնքների տնտեսական զարգացման կարեւորությունը, ՀԱԵ Տավուշի թեմի հետ միասին իրականացնում ենք «Տավուշի անուշներ» ծրագիրը, որի շրջանակներում Հաղարծինի վանքային համալիրին կից մի փոքրիկ արտադրամաս է կառուցվել»,-ասաց Կարինե Բաղդասարյանը` նշելով, որ այդ արտադրամասում տավուշցի երիտասարդները մեծ ոգեւորությամբ մուրաբա են պատրաստում, քանի որ վաճառքից ստացած հասույթը տրամադրվում  է սահմանամերձ  համայնքների զարգացմանը:

ԵՀԽ հայաստանյան Կլոր սեղան հիմնադրամը ստեղծվել է Հայ Առաքելական Սուրբ Եկեղեցու և Եկեղեցիներիհամաշխարհային խորհրդի նախաձեռնությամբ և Հայ Կաթողիկե եւ Հայ Ավետարանական եկեղեցիների մասնակցությամբ:Կլոր սեղան հիմնադրամը սկսել է իր գործունեությունը 1996 թ. (գրասենյակը հիմնադրվել է 1997թ.):