Հայ գեղանկարչությունն արտասահմանում ներկայացնող «Նոյյան Տապան» պատկերասրահը ցանկություն ունի ներկայանալ հայրենիքում

Անցած շաբաթ Լիբանանի մայրաքաղաք Բեյրութում տեղի ունեցավ «Քսան տարին երևանդին» խորագիրը կրող գեղանկարչական աշխատանքների ցուցահանդես, որը նվիրված էր ՀՀ անկախության 25-ամյակին և «Նոյյան Տապան» պատկերասրահի հիմնադրման 20-ամյակին: Այս մասին հայտնում է Past.am-ը:

Հանդիսությանն իր ողջույնի խոսքով ներկայացավ Լիբանանում ՀՀ արտակարգ և լիազոր դեսպան Սամվել Մկրտչյանը: Պատկերասրահի տնօրեն Մովսես Հերկելյանը մեզ պատմեց, որ այն հիմնադրել են չորս ընկեր՝ ինքը, Հենրիկ Իգիթյանը, Ռուբեն Ավագյանն ու Մհեր Սահակյանը: Գաղափարը Հենրիկ Իգիթյանինն էր: «Մինչ օրս մասնակցել ենք 35 միջազգային փառատոնի, իսկ 36-րդը պետք է լինի Սինգապուրում: Այն նախատեսված է գալիք տարվա հունվարին: Մենք կազմակերպել ենք հարյուրավոր ցուցահանդեսներ, որոնք ունեցել են նաև բարեգործական բնույթ: Մեզ է պատկանում գեղանկարիչներ Վահրամ Դավթյանի, Սուրեն Ոսկանյանի, Դավիթ Դավթյանի և Էդիկ Բերթյանի աշխատանքների ցուցադրման բացառիկ իրավունքը: Հավաքում ենք եղեռնից մազապուրծ եղած լիբանանահայ արվեստագետ Ժան Դարբինյանի գործերը»,- տեղեկացրեց պարոն Հերկելյանը:

Անդրադառնալով այն հարցինն, թե ինչո՞ւ են հայկական գեղանկարչությունը ցուցադրում դրսում, բայց դեռ հայրենիքում ցուցահանդես չեն կազմակերպել՝ «Նոյյան Տապան» պատկերասրահի տնօրենն ասաց, որ հիմնական խնդիրն ի սկզբանե եղել է մեր արվեստագետներին դրսում ներկայացնելը, սակայն պահը հասունացել է նաև ներկայանալ Հայաստանում: «Մենք այն համոզմունքն ունենք, որ հայկական ցուցասրահները պետք է միասնական աշխատեն՝ ի նպաստ մեր հայրենի գեղանկարիչների հանրահռչակման: Այս ուղղությամբ մեզ հետ մեծ աշխատանք է տանում Երևանի «Բարձրարվեստ» ցուցասրահը»,-ընդգծեց Մովսես Հերկելյանը:

Լևոն Փանոսյան