Իսպանիայում կողոպուտի կասկածանքով հիսուն վրացի է ձերբակալվել

Իսպանիայի ազգային ոստիկանությունը նոյեմբերի 29-ին Վրաստանի հիսուն քաղաքացիների է ձերբակալել, որոնց կասկածում է հարյուրավոր բնակարանային կողոպուտների մեջ, փոխանցում է DW-ը։Իսպանական իրավապահ մարմինների ներկայացուցչի խոսքով վերջին տարիների  այս խոշորագույն ոստիկանական գործողությունն իրականացվել է Մադրիսում, Բարսելոնայում, Սեւիլյայում, նաեւ Իսպանիայի հյուսիսում՝ Բարակալդո ավանում։ Վրաստանի քաղաքացիներին մեղադրում են բնակարանային հարյուրավոր կողոպուտներ կազմակերպելու մեջ։  Ձերբակալվել են նաեւ մի քանի իսպանացիներ։ Ոստիկանությունում կարծում են, որ նրանց օգնությամբ են գողերը իրացրել իրենց գողոնը՝ հիմնականում ոսկերչական զարդեր ու ժամացույցներ։

Ձերբակալվածներին սպառնոմ է մեղադրանք նաեւ հանցավոր ճանապարհով ձեռք բերված գումարների լվացման, հանցախմբին անդամակցելու մեջ։ Բացի դրանից նրանցից մի քանիսին կարող են մեղադրել զենք ու թմրանյութեր պահելու, նաև փաստաթղթեր կեղծելու մեջ։

Ձերբակալվածներից բացի միջազգային հետախուզում է հայտարարվել նաև Վրաստանի քաղաքացի Սպարտակ Ջապարիձեի նկատմամբ ։ Իսպանական ոստիկանությունը համարում է, որ հենց նա է հանցախմբի պարագլուխը եղել։ Իրավապահների կարծիքով նա կարող է Իտալիայում լինել։

Իսպանացի երկու ոստիկան մոտ օրերս Վրաստան կմեկնեն տեղի գործընկերների հետ իրենց գործողությունները համակարգելու համար։ Սա առաջին դեպքը չէ, երբ Իսպանիայի իրավապահները գործ ունեն ազգությամբ վրացի կողոպտիչների հետ։ Իսպանիայի ազգային դատական պալատը շարունակում է  «օրենքով գող» Զվիադ Դարսաձեի գործով քննությունը, որին 2015-ին են կալանավորել; Նրան մեղադրում են մի քանի տարի շարունակ իր ղեկավարած հանցախմբի հետ միասին Իսպանիայում բնակարանների կողոպուտ կազմակերպելու մեջ։